ডিজিটেল ডেস্কঃ এছিয়ান গেমছ ২০২৩ৰ তৃতীয় দিনাও ভাৰতীয় খেলুৱৈসকলৰ চমকপ্ৰদ সাফল্যৰ ধাৰা অব্যাহত থাকে। তৃতীয় দিনা ভাৰতে তৃতীয়টো স্বৰ্ণ পদক লাভ কৰে। ভাৰতৰ অশ্বাৰোহীৰ দলটোৱে ৪১ বছৰৰ পাছত স্বৰ্ণ পদক লাভ কৰি ইতিহাস ৰচনা কৰে। ভাৰতীয় অশ্বাৰোহী সুদীপ্তী হাজেলা, দিব্যাকীৰ্তি সিং, অনুষ আগৰৱালা আৰু হৃদয় চেদাই দলীয় ইভেণ্টটোত সোণৰ পদক লাভ কৰে।
ঘোঁৰা চালনাৰ ৪০ বছৰীয়া ইতিহাসত ভাৰতে প্ৰথমবাৰৰ বাবে এছিয়ান গেমছত সোণৰ পদক লাভ কৰিবলৈ সক্ষম হয়। ড্ৰেছেজ ইভেণ্টৰ ফাইনেলত ভাৰতৰ অশ্বাৰোহী অনুষ, সুদীপ্তি, দিব্যাকিৰ্তী, হৃদয়ে আকৰ্ষণীয় প্ৰদৰ্শন আগবঢ়ায়। দলটোৱে মুঠ লাভ কৰে ২০৯.২০৫ পইণ্ট। দিব্যাকৰ্তীয়ে ৬৮.১৭৬ পইণ্ট, হৃদয়ে ৬৯.৯৪১ পইণ্ট আৰু অনুষে ৭১.০৮৮ পইণ্ট লাভ কৰে।ইভেণ্টটো ভাৰতীয় দলটো চীনতকৈ ৪.৫ পইণ্ট আগবাঢ়ি থাকে ।
উল্লেখ্য যে তৃতীয় দিনা ভাৰতে লাভ কৰিলে এছিয়ান গেমছৰ তৃতীয়টো স্বৰ্ণ পদক। ইয়াৰ পূৰ্বে মহিলা ক্ৰিকেট দলে স্বৰ্ণ পদক লাভ কৰিছিল। চূড়ান্ত খেলখনত ভাৰতীয় মহিলা দলে শ্ৰীলংকাক ১৯ ৰাণত পৰাস্ত কৰে। ইয়াৰ পূৰ্বে ভাৰতে শ্বুটিঙত স্বৰ্ণ পদক লাভ কৰিছিল। এতিয়া টিম ইণ্ডিয়াৰ হাতত মুঠ ১৪টা পদক। ভাৰতৰ ৩টা স্বৰ্ণ, ৪টা ৰূপ আৰু ৭টা ব্ৰঞ্জৰ পদক। টীম ইণ্ডিয়াই মঙলবাৰে পালতোলাত ২টা ব্ৰঞ্জৰ পদক লাভ কৰে।
স্মৰ্তব্য যে ঘোঁৰা চালনাৰ ড্ৰেছেজ ইভেণ্টত ভাৰতে সোণৰ পদক লাভ কৰিছিল। আনহাতে চীনৰ দলটোৱে দ্বিতীয় স্থান লাভ কৰে। মুঠ ২০৪.৮৮২ পইণ্ট লাভ কৰে চীনে। হংকঙে লাভ কৰে ২০৪.৮৫২ পইণ্ট। এই দলটোৱে তৃতীয় স্থান লাভ কৰে। একেদৰে চাইনিজ-টাইপেইৰ দলটোৱে চতুৰ্থ স্থান আৰু ইউ এ ইৰ দলটোৱে পঞ্চম স্থান দখল কৰে।
Continue Reading
