ডিজিটেল ডেস্কঃএছিয়ান গেমছৰ বক্সিঙৰ ফাইনেলত প্ৰৱেশ কৰিলে লাভলীনা বৰগোঁহায়ে । চীনৰ হাংঝৌত চলি থকা এছিয়ান গেমছ ২০২৩ ত মঙলবাৰে লাভলীনাই চতুৰ্থগৰাকী ভাৰতীয় বক্সাৰ হিচাপে ফাইনেলত প্ৰৱেশ কৰিছে। মহিলাৰ ৭৫ কিলোগ্ৰাম বক্সিং প্ৰতিযোগিতাত লাভলীনাই ছেমি ফাইনেলত থাইলেণ্ডৰ বাইচন মানেকনক পৰাস্ত কৰি বুধবাৰে অনুষ্ঠিত হ'বলগীয়া ফাইনেলৰ বাবে স্থান নিশ্চিত কৰে৷
উল্লেখ্য আশা কৰা ধৰণেই অসম কন্যা লাভলীনা বৰগোঁহাইয়ে চীনত অনুষ্ঠিত হৈ থকা এছিয়ান গেমছত পদক নিশ্চিত কৰিবলৈ সক্ষম হ’ল। মহিলাৰ ৭৫ কিলোগ্ৰাম বক্সিং কোৱাৰ্টাৰ ফাইনেলত লাভলীনা বৰগোহাঁইয়ে দক্ষিণ কোৰিয়াৰ চুয়ন চেয়ংক ৫:০ ব্যৱধানত পৰাস্ত কৰি মহিলাৰ ৭৫ কিলোগ্ৰাম ইভেণ্টৰ ছেমিফাইনেলত স্থান দখল কৰিবলৈ সক্ষম হৈছিল।
এনে জয়ৰ জড়িয়তে লাভলীনাই ভাৰতৰ বাবে পদকো নিশ্চিত কৰিছিল। উল্লেখ্য লাভলীনাই এইবেলি চীনত অনুষ্ঠিত হোৱা এছিয়ান গেমছৰ উদ্বোধনী অনুষ্ঠানত ভাৰতৰ জাতীয় পতাকা কঢ়িয়াই নিয়াৰ সৌভাগ্য লভিছিল। উল্লেখ্য লাভলীনাই প্ৰথম বাৰৰ বাবে ২০১৮ চনত ভাৰতক AIBA মহিলা বক্সিং বিশ্ব চেম্পিয়নশ্বিপত প্ৰতিনিধিত্ব কৰিছিল।
সেই প্ৰতিযোগিতাত লাভলীনাই মহিলাৰ ৬৯ কিলোগ্ৰাম শাখাত ব্ৰঞ্জৰ পদক লাভ কৰিছিল।২০২০ চনৰ মাৰ্চ মাহত লাভলীনাই উজবেকিস্তানৰ মফতুনাখন মেলিভাক ৫-০ ব্যৱধানত পৰাস্ত কৰি টকিঅ অলিম্পিকৰ বাবে নিৰ্বাচিত হৈছিল আৰু টকিঅ' অলিম্পিকৰ ৬৯ কিলোগ্ৰাম ছেমিফাইনেল তুৰ্কীৰ বিশ্ব চেম্পিয়ন বুচেনাজ সুৰমেনেলিৰ হাতত পৰাজিত হৈ ব্ৰঞ্জৰ পদক লাভ কৰিছিল।
Continue Reading
