ডিজিটেল ডেস্কঃ ৰীল বনোৱাৰ নামত এতিয়ালৈকে বহুতেই মৃত্যুক সাৱটি ল’বলগীয়া হৈছে। এইবাৰ পুনৰ ৰীলৰ বাবেই এগৰাকী যুৱতীয়ে কৰুণ মৃত্যুক সাৱটি ল’বলগীয়া হৈছে। ঘটনাটোৰ ভিডিঅ’ ইতিমধ্যে ভাইৰেল হৈ পৰিছে। মহাৰাষ্ট্ৰৰ পাহাৰীয়া অঞ্চলত এগৰাকী যুৱতীয়ে গাড়ীৰে সৈতে ৩০০ ফুট দ খাৱৈত বাগৰি পৰে । ফলত তেওঁৰ মৃত্যু ঘটে। সমগ্ৰ ঘটনাটো মৃত যুৱতীগৰাকীৰ সংগীয়ে তোলা ভিডিঅ’টোত ধৰা পৰিছে। যিটো ভিডিঅ’ ছচিয়েল মিডিয়াত ভাইৰেল হৈ পৰিছে।
আৰক্ষী সূত্ৰৰ পৰা জানিব পৰা মতে, ৰীল বনাই থকা অৱস্থাতে দুৰ্ঘটনাত মৃত্যু হয় ২৩ বছৰীয়া শ্বেতা দীপক সৰৱাছৰ। তেওঁৰ সংগী আছিল ২৫ বছৰীয়া সুৰজ সঞ্জু খচ্চৰ। দুয়োজনে ঔৰংগাবাদৰ পৰা চুলিভাঞ্জন পাহাৰলৈ গৈছিল।তাতেই কেনেকৈ গাড়ী চলাব লাগে তাৰ ৰীল বনাই আছিল যুৱতীগৰাকীয়ে। ভাইৰেল ভিডিঅ’টোত শ্বেতাই মুখত হাঁহি লৈ লাহে লাহে গাড়ীখন পিছুৱাই থকা দেখা গৈছে। প্ৰথম অৱস্থাত খাদৰ পৰা প্ৰায় ৫০ মিটাৰ দূৰত্বত আছিল। কিন্তু পিছুৱাই গৈ গৈ খাদত পৰি যায়।
ভিডিঅ’টোত দেখা গৈছে, সুৰজে চিঞৰিছে আৰু শ্বেতাক গাড়ী ৰখাবলৈ সকীয়াই দিছে, গাড়ীখনৰ গতি কমাই দিবলৈ কৈছে । এটা সময়ত তেওঁ চিঞৰি উঠিল ‘ক্লাচ ক্লাচ ক্লাচ’। কিন্তু তাৰ আগতে গাড়ীখন ৩০০ ফুট দ’ খাৱৈত বাগৰি পৰিল। থিতাতে মৃত্যু হয় যুৱতীগৰাকীৰ। খবৰ লাভ কৰাৰ পিছতে স্থানীয় থানাৰ আৰক্ষীয়ে গাড়ীখনৰ লগতে যুৱতীগৰাকীৰ মৃতদেহ উদ্ধাৰ কৰিছে।
Continue Reading
