ডিজিটেল ডেস্কঃ এগৰাকী ডাক্তৰৰ দুগৰাকী পত্নী। দুই পত্নীৰ কাজিয়া এতিয়া ভাইৰেল হৈ পৰিল ছচিয়েল মিডিয়াত।
মুজাফ্ফৰনগৰৰ এখন ফেমিলি ক্লিনিকত ডাক্তৰৰ পত্নী দুগৰাকীৰ মাজত বিবাদ ইমানেই বাঢ়ি গ’ল যে দুয়োৰে মাজত তীব্ৰ কাজিয়া হ’ল। ডাক্তৰৰ প্ৰথম পত্নীয়ে দ্বিতীয়গৰাকী পত্নীক মহিলা সংগীসকলৰ সৈতে লগলাগি মাৰপিট কৰে। ঘটনাটো তাত সংস্থাপন কৰা চিচিটিভি কেমেৰাত বন্দী হৈছে।
মুজাফ্ফৰনগৰৰ বুধনা অঞ্চলত ডাঃ কাছিম আলীৰ ক্লিনিক আছে। তেওঁ দুবাৰকৈ বিয়া পাতিছে। প্ৰথম বিবাহ আয়েছাৰ সৈতে হোৱাৰ বিপৰীতে দ্বিতীয়খন বিয়া হৈছে ফাৰাহ আঞ্জুমৰ সৈতে। তিনিদিন আগতে তেওঁৰ দ্বিতীয় পত্নীয়ে তেওঁক লগ কৰিবলৈ ক্লিনিকলৈ গৈছিল। কিন্তু, তেওঁক অহা দেখি ডাক্তৰজন পলাই যায়। ইয়াৰ পিছত দ্বিতীয় পত্নীয়ে চকীখনত বহি স্বামীৰ বাবে অপেক্ষা কৰিবলৈ ধৰিলে।
এই বিষয়ে কোনোবাই ডাক্তৰৰ প্ৰথম পত্নীক জনোৱাত তেওঁ মহিলা সংগীসকলক লগত লৈ আহি সেই স্থানত উপস্থিত হল। ইয়াৰ পিছত ফাৰাহক তেওঁলোকে লাঠিৰে তীব্ৰ প্ৰহাৰ কৰিলে। এই মাৰপিটৰ ফলত বেয়াকৈ আঘাতপ্ৰাপ্ত হয় ফাৰাহ আঞ্জুম। ক্লিনিকৰ পৰা চিঞৰ-বাখৰ শুনি চুবুৰীয়াই সেই স্থানত উপস্থিত হৈ কাজিয়া শান্ত কৰি ফাৰাহক চিকিৎসালয়ত ভৰ্তি কৰে।
এই সমগ্ৰ কাজিয়াৰ ঘটনা ক্লিনিকত লগোৱা চিচিটিভি কেমেৰাত বন্দী হৈছিল। অৱশ্যে কোনোবাই গোপনে এই কাজিয়াৰ ভিডিঅ’ বনাই ছ’চিয়েল মিডিয়াত ভাইৰেল কৰিছিল। আনহাতে চিচিটিভিৰ ৰেকৰ্ডিং লৈ ফাৰাহে থানাত উপস্থিত হয়।
দ্বিতীয় পত্নীয়ে স্বামী, প্ৰথম পত্নী আৰু সহযোগী মহিলা ফাৰ্জানা, গুলছান, নোমানা, চাইমা, ছিমৰান, নভিছাকে ধৰি অজ্ঞাত এজনৰ বিৰুদ্ধে এফআইআৰ দাখিল কৰে।
এই গোচৰত চি অ’ বিনয় কুমাৰ গৌতমে কয় যে মহিলাগৰাকীৰ অভিযোগত চিকিৎসক আৰু তেওঁৰ পত্নীকে ধৰি ৭জন লোকৰ বিৰুদ্ধে এফ আই আৰ ৰুজু কৰা হৈছে। অভিযুক্তক গ্ৰেপ্তাৰ কৰিবলৈ আৰক্ষীয়ে অভিযান চলাইছে।
Continue Reading
