ডিজিটেল ডেস্কঃ পইচাত ছপোৱা হ’ব লিঅ’নেল মেছিৰ ছৱি! ৩৬ বছৰৰ মূৰত দেশক বিশ্বকাপ বিজয়ৰ আনন্দ প্ৰদান কৰা লিঅ’নেল মেছিৰ ছৱি পইচাত ছপোৱাৰ কথা ভাবিছে আৰ্জেণ্টিনাৰ চেণ্ট্ৰেল বেংকে।
দেশখনৰ সংবাদপত্ৰ এল ফিনান্সিয়েৰোৰ এটা বাতৰিত এয়া প্ৰকাশ পাইছে। বাতৰিটোত প্ৰকাশ কৰা মতে, হাজাৰ টকীয়া নোটত মেছিৰ ছৱি ছপোৱা হ’ব। বিশ্বকাপ বিজয়ৰ ঐতিহাসিক ক্ষণটোক স্মৰণীয় কৰি ৰাখিবলৈকে এই সিদ্ধান্তৰ বিষয়ে ভবা হৈছে।
কেৱল মেছিয়ে নহয়, নোটৰ বিপৰীত পিঠিত আৰ্জেণ্টিনাৰ প্ৰশিক্ষক লিঅ’নেল স্কাল’নিক সন্মান জনাই তেওঁৰো ছৱি ছপোৱা হ’ব।
বিশ্বকাপৰ ফাইনেলৰ পূৰ্বেই এই বিষয় আলোচনা কৰা হৈছিল। প্ৰথমতে আমোদ লাভৰ বাবেই এই প্ৰস্তাৱ আগবঢ়োৱা হৈছিল। বিশেষকৈ আৰ্জেণ্টিনাৰ জনপ্ৰিয় ফুটবল ক্লাব ব’কা জুনিয়ৰছ আৰু ইনডিপেনডিয়েণ্টৰ সমৰ্থকসকলে এই প্ৰস্তাৱত সমৰ্থন জনাইছিল। তেওঁলোকে কৈছিল যে মেছিৰ ছৱি থকা নোটে আৰ্জেণ্টাইনসকলৰ একতাক জাগ্ৰত কৰিব।
ইয়াৰ পূৰ্বেও ১৯৭৮ চনত ডেনিয়েল পাচাৰেলাৰ নেতৃত্বত বিশ্বচেম্পিয়ন হৈছিল আৰ্জেণ্টিনা। তেতিয়াও সেই বিজয়ক স্মৰণীয় কৰি ৰাখিবলৈ এটা কইনছ প্ৰকাশ কৰা হৈছিল।
Continue Reading
