ডিজিটেল ডেস্কঃ দেশত ইটোৰ পিছত সিটোকৈ মহা মূল্যৱান প্ৰাকৃতিক সম্পদ আৱিষ্কাৰ হোৱাৰ কথাই এতিয়া আনন্দিত কৰি তুলিছে বহুতকে৷ চাৰি মাহৰ ব্যৱধানত দেশত পুনৰ 'বগা সোণ' পোৱা গৈছে। জম্মু আৰু কাশ্মীৰৰ পিছত এইবাৰ ৰাজস্থানতো 'বগা সোণ' হিচাবে পৰিচিত লিথিয়াম পোৱা গৈছে৷ এই আৱিষ্কাৰ নিঃসন্দেহে ভাৰতৰ বাবে গুৰুত্বপূৰ্ণ বুলি বিবেচিত হৈছে৷
ৰাজস্থানৰ ডেগানা অঞ্চলত এটা লিথিয়ামৰ খনি পোৱা গৈছে বুলি ৰাজস্থান চৰকাৰৰ এগৰাকী বিষয়াই প্ৰকাশ কৰিছে৷ ৰাজস্থানত পোৱা লিথিয়ামৰ সঠিক পৰিমাণ এতিয়াও জানিব পৰা হোৱা নাই। ভাৰতীয় ভূতাত্ত্বিক জৰীপ বিভাগৰ তথ্য অনুসৰি, ফেব্ৰুৱাৰীত জম্মু আৰু কাশ্মীৰত পোৱাতকৈ ৰাজস্থানত অধিক লিথিয়াম পোৱা যাব পাৰে বুলি ন্শ্চিত কৰা হৈছে৷ 
ফেব্ৰুৱাৰী মাহত, ভাৰতীয় ভূতাত্ত্বিক জৰীপে জম্মু আৰু কাশ্মীৰৰ ৰিয়াচি জিলাৰ চালাল-হাইমানা অঞ্চলত লিথিয়াম জমা থকাৰ কথা নিশ্চিত কৰিছিল৷ এই মূল্যৱান সামগ্ৰী বিধ দেশৰ ভিতৰত প্ৰথমবাৰৰ বাবে জম্মু আৰু কাশ্মীৰত পোৱা গৈছিল।
চৰকাৰী বিষয়াসকলে দাবী কৰিছে যে ৰাজস্থানত পোৱা লিথিয়ামৰ পৰিমাণে দেশৰ চাহিদাৰ ৮০ শতাংশতকৈও অধিক পূৰণ কৰিব পাৰিব।খনি মন্ত্ৰালয়ে কৈছে যে জম্মু আৰু কাশ্মীৰত ৫৯ লাখ টন লিথিয়াম পোৱা গৈছে। লিথিয়ামক 'বগা সোণ' বুলি কোৱা হয়৷ 
উল্লেখ্য সোণ হৈছে এক মূল্যৱান সামগ্ৰী। লিথিয়ামৰ মূল্যও পিছে কম নহয়৷ ভাৰতৰ দৰে উন্নয়নশীল দেশৰ বাবে লিথিয়াম এক 'অমূল্য ৰত্ন' । স্মাৰ্টফোন, লেপটপত ব্যৱহৃত ৰিচাৰ্জেবল বেটাৰীৰ এক মুখ্য উপাদান হৈছে লিথিয়াম। কেৱল সেয়াই নহয়, বৈদ্যুতিক গাড়ীতো লিথিয়ামৰ প্ৰয়োজন হয়৷ ।
কেন্দ্ৰই প্ৰদূষণ নিয়ন্ত্ৰণৰ বাবে দেশত বৈদ্যুতিক বাহনৰ অধিক প্ৰচলনত জোৰ দি আছে। আৰু এনে গাড়ীৰ বাবে প্ৰয়োজন হোৱা বেটাৰীটো হৈছে লিথিয়াম-আয়ন বেটাৰী।সেয়ে ৰাজস্থানত লিথিয়ামৰ খনি আৱিষ্কাৰ হোৱা খবৰটো এক ইতিবাচক খবৰ হৈ পৰিছে৷ 
Continue Reading
