ডিজিটেল ডেস্কঃ দেশৰ বহু পাঠ্যক্ৰমৰ পৰা মোগলৰ ইতিহাস বাদ দিয়াৰ প্ৰক্ৰিয়া চলি থকাৰ সময়তে এইবাৰ উৰ্দু আৰু পাৰ্চী ভাষাৰ এজন বিখ্যাত কবি ইকবাল বাদ পৰিল পাঠ্যক্ৰমৰ পৰা। বিখ্যাত গীত 'ছাৰে জাহা চে আচ্ছা হিন্দুস্তান হামাৰা'ৰ স্ৰষ্টা ইকবালৰ কথা এতিয়া আৰু ছাত্ৰ-ছাত্ৰীয়ে পাঠ্যক্ৰমত পঢ়িবলৈ নাপাব।
উল্লেখ্য ইকবালক দেশ বিভাজন কৰি পাকিস্তান সৃষ্টি কৰিব বিচৰা সকলৰ মাজৰে এজন হিচাপে জনা যায়।শেহতীয়াকৈ দিল্লী বিশ্ববিদ্যালয়ৰ একাডেমিক কাউন্সিলে পাঠ্যক্ৰম সম্পৰ্কীয় কেইবাটাও পৰিৱৰ্তনৰ কথা ঘোষণা কৰিছে। জানিব পৰা মতে এই পৰিৱৰ্তনবোৰৰ ভিতৰত কবি মহম্মদ ইকবালৰ কথা ৰাজনীতি বিজ্ঞানৰ পাঠ্যক্ৰমৰ পৰা আঁতৰাই দিয়া হৈছে। দিল্লী বিশ্ববিদ্যালয়ৰ পঞ্জীয়ক বিকাশ গুপ্তাই কয় যে পৰিষদৰ বৈঠকত কেইবাটাও প্ৰস্তাৱত অনুমোদন জনোৱা হৈছে।
উল্লেখ্য দিল্লী বিশ্ববিদ্যালয়ৰ ৰাজনীতি বিজ্ঞানৰ স্নাতক পাঠ্যক্ৰমত ইকবালৰ বিষয়ে ছাত্ৰ-ছাত্ৰীয়ে পঢ়িবলগীয়া হৈছিল। শৈক্ষিক পৰিষদে গ্ৰহণ কৰা প্ৰস্তাৱসমূহ দিল্লী বিশ্ববিদ্যালয়ৰ কাৰ্যবাহী পৰিষদৰ দ্বাৰা চূড়ান্ত কৰিব লাগিব। পৰিষদৰ বৈঠক ৯ জুনত অনুষ্ঠিত হ'ব। বিজেপিৰ ছাত্ৰ সংগঠন এবিভিপিয়ে কবি ইকবালক পাঠ্যক্ৰমৰ পৰা আঁতৰ কৰিবলৈ গ্ৰহণ কৰা সিদ্ধান্তক আদৰণি জনাইছে।
এবিভিপিৰ এগৰাকী নেতাই কয় "দিল্লী বিশ্ববিদ্যালয়ৰ একাডেমিক কাউন্সিলে পাঠ্যক্ৰমৰ পৰা গোড়া ধৰ্মীয় পণ্ডিতজনক আঁতৰাবলৈ যি সিদ্ধান্ত লৈছে সেয়া সঠিক সিদ্ধান্ত। ইকবালক পাকিস্তানৰ দাৰ্শনিক পিতৃ বুলি কোৱা হয়। তেওঁ মুছলিম লীগত মহম্মদ আলী জিন্নাক নেতা হিচাপে প্ৰতিষ্ঠা কৰাত গুৰুত্বপূৰ্ণ ভূমিকা পালন কৰিছিল।’’
Continue Reading
