ডিজটেল ডেস্কঃ আফগানিস্তানত স্ত্ৰী শিক্ষাৰ বিৰোধিতাৰ ঢৌ উঠিছে। তালিবান শাসিত দেশখনত স্কুলীয়া ছাত্ৰীক বিষাক্ত খাদ্য খোৱাই হত্যা কৰাৰ চেষ্টা চলোৱা বুলি বাতৰি প্ৰকাশ পাইছে।
জানিব পৰা মতে, সংকটজনক অৱস্থাত ৮০ গৰাকী ছাত্ৰীক চিকিৎসালয়ত ভৰ্তি কৰা হৈছে। একেৰাহে দুদিন উত্তৰ আফগানিস্তানৰ দুখন বিদ্যালয়ত ভালেসংক্যক ছাত্ৰী অসুস্থ হৈ পৰে। ছাত্ৰীসকলক বিষাক্ত দ্ৰব্য সেৱন কৰোৱাৰ গুৰুতৰ অভিযোগ উত্থাপন হৈছে।
অৱশ্যে, আফগানিস্তানৰ স্থানীয় প্ৰশাসনে এই অভিযোগ অস্বীকাৰ কৰি বিষয়টো ব্যক্তিগত আক্ৰোশৰ ফল বুলিহে দাবী কৰিছে।
প্ৰকাশ পোৱা মতে, যোৱা শনি আৰু দেওবাৰে সঞ্চাৰক জিলাৰ দুগৰাকী প্ৰাথমিক বিদ্যালয়ৰ ছোৱালী অসুস্থ হৈ পৰে। এই বিদ্যালয় দুখন ওচৰা-ওচৰি। ততাতৈয়াকৈ দুখন বিদ্যালয়ৰ অসুস্থ ছাত্ৰীসকলক চিকিৎসালয়ত ভৰ্তি কৰোৱা হয়।
অৱশ্যে, ৮০ গৰাকী ছাত্ৰীক চিকিৎসালয়লৈ প্ৰেৰণ কৰিলেও আটাইকেইগৰাকী সুস্থ বুলি স্থানীয় শিক্ষা বিষয়াগৰাকীয়ে জনায়। ঘটনাৰ তদন্ত চলি থকা বুলিও তেওঁ কয়। তৃতীয় পক্ষৰ ব্যক্তিগত আক্ৰোশৰ বাবেই এই ঘটনা সংঘটিত হোৱা বুলি প্ৰশাসনে অনুমান কৰিছে বুলিও প্ৰকাশ কৰিছে।
২০২১ চনত আফগানিস্তানত ক্ষমতা দখল কৰাৰ পিছত তালিবানে মহিলাৰ শিক্ষাৰ ওপৰত প্ৰতিবন্ধকতা স্থাপন কৰি আহিছে। ছোৱালীৰ বাবে স্কুল-কলেজ বন্ধ কৰি দিয়া হৈছে। কিন্তু বিভিন্ন পক্ষৰ হেঁচাত কিছুদিনৰ পাছত ছোৱালীৰ বাবে প্ৰাথমিক বিদ্যালয়ৰ দুৱাৰ পুনৰ মুকলি কৰিবলৈ বাধ্য হয় তালিবান প্ৰশাসন।
তেতিয়াৰ পৰা আফগান ছোৱালীয়ে ষষ্ঠ শ্ৰেণীলৈকে পঢ়িব পাৰে। এতিয়া অভিযোগ উঠিছে যে ছোৱালীসকলৰ শিক্ষা গ্ৰহণৰ সেই বাট বন্ধ কৰিবলৈ বিষ প্ৰয়োগ কৰা হৈছে। কাৰণ সাধাৰণ তালিবানীয়ে স্ত্ৰী শিক্ষাৰ এতিয়াও বিৰোধিতা কৰি আহিছে।
Continue Reading
