ডিজিটেল ডেস্কঃ মেছি আৰু ৰোণাল্ডো৷ দীৰ্ঘদিন ধৰি দুয়োজনৰ মাজত তীব্ৰ প্ৰতিদ্বন্দিতা চলি আহিছে৷ দুয়োজনকে ফুটবল ইতিহাসৰ শ্ৰেষ্ঠতম খেলুৱৈ বুলি ধৰা হয়৷ ৰোণাল্ডো আৰু মেছিক লৈ অনুৰাগীসকলৰ মাজতো তীব্ৰ বাক-বিতণ্ডা চলে৷ বিশ্বজুৰি আছে তেওঁলোকৰ কোটি কোটি অনুৰাগী৷
কিন্তু মেছি আৰু ৰোণাল্ডো খেলপথাৰতহে উভয়ৰে প্ৰতিদন্বন্দী, ব্যক্তিগত জীৱনত পৰস্পৰে পৰস্পৰৰ প্ৰতি আছে গভীৰ সমীহ আৰু শ্ৰদ্ধা৷
কাটাৰ বিশ্বকাপৰ পূৰ্বে সামাজিক মাধ্যমত বিয়পি পৰিছিল দুয়োজন তাৰকাৰ এখনি বিশেষ ফটো৷ দুয়োজনে মুখামুখিকৈ বহি দবা খেলি থকাৰ ফটোখনে ইনষ্টাগ্ৰামত ধুমুহাৰ সৃষ্টি কৰিছিল৷
ফটোখনত দেখা গৈছিল, দুয়োজন তাৰকাই একোটাকৈ গোল ডিঙিৰ টি-চাৰ্ট আৰু ডেনিম জিনছ পৰিধান কৰি আছে৷ মেছিৰ হাত গালত, ৰোণাল্ডোৰ হাত কপালত৷ দুয়োজনে তীব্ৰ মনোযোগেৰে দবা খেলত নিমগ্ন আছে৷
ফটোখন বিয়পি পৰাৰ পাছতে কিছুসংখ্যক অনুৰাগীয়ে ভাবিছিল যে ছৱিখন কম্পিউটাৰত বনোৱা হৈছে৷ কিন্তু পাছত জনা গ’ল যে সঁচাকৈয়ে একেলগে কেমেৰাৰ সমুখত ধৰা দিছিল দুয়োজন প্ৰতিদ্বন্দিয়ে৷ এটা ফেশ্বন সংস্তা লুই ভিট্টঁই এই ফটোখন বিজ্ঞাপন হিচাপে প্ৰকাশ কৰিছিল৷
ফেশ্বন সংস্থাটোৰ এই বিজ্ঞাপনৰ বক্তব্য তথা থীম আছিল- ভিক্টৰী ইজ এ ষ্টেট অৱ মাইণ্ড (বিজয় মানে মস্তিষ্কৰ এটা ভাৱনা)৷ দুয়োগৰাকী তাৰকাই এই বক্তব্যৰেই ছৱিখন নিজৰ নিজৰ ইনষ্টাগ্ৰাম একাউণ্টত প’ষ্ট কৰিছিল৷
ফটোখনৰ বাবে ফেশ্বন সংস্থাটোৰ খৰচ হৈছিল ৫০ কোটি টকা৷ ৰোণাল্ডোৱে লাভ কৰিছিল ১৬ কোটি টকা৷ মেছিয়ে লাভ কৰিছিল ১৪ কোটি টকা৷ ফটোখন কেমেৰাত আৱদ্ধ কৰিছিল বিখ্যাত ফটোগ্ৰাফাৰ য়ানি লিবোভিটজে৷
Continue Reading
