ডিজিটেল ডেস্কঃ এখন ক্ৰিকেট মেচত ন ব’ল দিয়াৰ বাবে প্ৰাণ হেৰুৱালে এজন আম্পায়াৰে। দেওবাৰে ওড়িশাৰ কটকৰ পৰা এই ঘটনাৰ খবৰ পোৱা গৈছে।
সবিশেষ তথ্য অনুসৰি, ‘ন’ বল’ চিগনেলক লৈ হোৱা কাজিয়াৰ ফলত ২২ বছৰীয়া লাকী ৰাউত নামৰ আম্পায়াৰৰ দায়িত্ব পালন কৰা এজন যুৱকে প্ৰাণ হেৰুৱায়। স্মৃতি ৰঞ্জন ৰাউট নামৰ এজন যুৱকে তেওঁক ছুৰীৰে আঘাত কৰি হত্যা কৰে।
প্ৰত্যক্ষদৰ্শীয়ে জনোৱা মতে, লাকী ৰাউটক খেলপথাৰত চোকা দাৰে আঘাত কৰা হয়। তাৰ পিছতে অভিযুক্তক খেলপথাৰত উপস্থিত থকা লোকে ধৰি আৰক্ষীক গতাই দিয়ে। ততাতৈয়াকৈ লাকী ৰাউটক চিবি মেডিকেল কলেজ আৰু চিকিৎসালয়লৈ লৈ যোৱাত চিকিৎসকে মৃত বুলি ঘোষণা কৰে।
খবৰ অনুসৰি এই খেলখন দুখন গাঁৱৰ দুটা দলৰ মাজত অনুষ্ঠিত হৈছিল - ব্ৰহ্মপুৰ আৰু শংকৰপুৰ। এই ঘটনাই গাঁও দুখনত উত্তেজনাৰ সৃষ্টি কৰে। কোনো ধৰণৰ অপ্ৰীতিকৰ ঘটনা সংঘটিত নহ’বলৈ আৰক্ষী বাহিনী মোতায়েন কৰা হৈছে। গোচৰৰো তদন্ত আৰম্ভ কৰা হৈছে।
Continue Reading
