ৰে’লত জ্যেষ্ঠসকলৰ বাবে ভাড়া ৰেহাইৰ পোষকতা অৰবিন্দ কেজৰিৱালৰঃ প্ৰধানমন্ত্ৰীলৈ লিখিলে চিঠি

ডিজিটেল ডেস্কঃ ৰে’ল ভাড়াত জ্যেষ্ঠ নাগৰিকক দিয়া ৰেহাই বিলুপ্ত হোৱাৰ পৰিঘটনা বহু আগতেই পাৰ হৈ গৈছে। এনে পৰিস্থিতিত পুনৰ জ্যেষ্ঠ নাগৰিকক ৰেহাই দিয়াৰ দাবীয়ে গতি লাভ কৰিছে। এতিয়া দিল্লীৰ মুখ্যমন্ত্ৰী অৰবিন্দ কেজৰিৱালেও এই বিষয় সন্দৰ্ভত প্ৰধানমন্ত্ৰীলৈ চিঠি লিখিছে।

 দিল্লীৰ মুখ্যমন্ত্ৰী অৰবিন্দ কেজৰিৱালে প্ৰধানমন্ত্ৰীলৈ পত্ৰযোগে লিখিছে যে ‘বৃদ্ধসকলৰ আশীৰ্বাদ অবিহনে দেশখন আগবাঢ়িব নোৱাৰে বাবেই বৃদ্ধসকলৰ ৰেহাইৰ অন্ত পেলোৱাটো অতি দুৰ্ভাগ্যজনক। এনে পৰিস্থিতিত পুনৰ জ্যেষ্ঠ নাগৰিকসকলৰ ৰে’লভাড়া হ্ৰাস কৰিবলৈ প্ৰধানমন্ত্ৰীক আহ্বান জনাইছে। আমি বৃদ্ধসকলৰ বাবে বিনামূলীয়াকৈ তীৰ্থযাত্ৰাত পঠিয়াব লাগে। ১৬০০ কোটি টকা ৰাহি কৰিবলৈ বৃদ্ধৰ ৰেহাই শেষ কৰাটো ভুল।"

 উল্লেখযোগ্য যে বহুদিন ধৰি বৃদ্ধসকলক দিয়া ৰেহাই পুনৰ ঘূৰাই দিব পৰাৰ খবৰ আহিছিল, কিন্তু এতিয়ালৈকে এনে হোৱা নাই। দৰাচলতে ক’ভিড মহামাৰীৰ সময়ত আৰ্থিক অৱস্থাৰ দুৰ্বলতাৰ পৰিপ্ৰেক্ষিতত ৰেলৱে বিভাগে জ্যেষ্ঠ নাগৰিককে ধৰি আন তিনিটা শ্ৰেণীৰ ভাড়াৰ ৰেহাই বন্ধ কৰি দিছিল।

 কৰ’না মহামাৰীৰ পূৰ্বে ৬০ বছৰৰ ওপৰৰ নাগৰিকে ৫০ শতাংশ ৰেহাই লাভ কৰিছিল। মহামাৰীৰ ভাবুকি কমি দেশৰ আন সকলো কাম-কাজ সম্পূৰ্ণ স্বাভাৱিক হৈ পৰাৰ পাছতো জ্যেষ্ঠ নাগৰিকৰ এই সকাহ পুনৰ ঘূৰাই পোৱা নাছিল।