ডিজিটেল ডেস্কঃ মৃত্যু কেতিয়া আহে কোনেও নাজানে। যাত্ৰাপথত কেতিয়াবা ৰৈ থাকে মৃত্যুৰ দূত। এক ভয়ংকৰ ঘটনা সংঘটিত হৈছে। ৰে’লত যাত্ৰা কৰি প্ৰাণ গ’ল এজন ৩৫ বছৰীয়া যুৱকৰ। ঘটনাটো আলিগড়ত সংঘটিত হৈছে। জানিব পৰা মতে যুৱক জনে নীলাঞ্চল এক্সপ্ৰেছত যাত্ৰা কৰি আছিল। নীলাঞ্চল এক্সপ্ৰেছখন নিশা প্ৰায় ৯.৩০ বজাত আলিগড় ষ্টেচনৰ প্লেটফৰ্ম নম্বৰ-৩ত উপস্থিত হয়।
সোমনা আৰু ডাম্বৰ ৰে’ল ষ্টেচনৰ মাজত ডিঙিত লোহাৰ ৰ’ড সোমাই যুৱকজনৰ মৃত্যু হয়। দুৰ্ঘটনাটোৰ পাছত ৰেলখনত আতংকৰ সৃষ্টি হয়। ৰে’লখন ৰখাবলৈ পোৱাৰ আগতেই যাত্ৰীজনৰ মৃত্যু হয়। মৃত যাত্ৰীগৰাকী গোপীনাথপুৰ চুলতানপুৰৰ বুলি জানিব পৰা গৈছে। মৃত যুৱকজনৰ নাম হৰিকেশ ডুবে।
তেওঁ দিল্লীৰ পৰা আহি আছিল। ঘটনাৰ পাছতে ৰে’লৱেৰ বিষয়াসকল উপস্থিত হয় সেই স্থানত। ৰে’লপথৰ পৰা সেই স্থানতে নিৰ্মাণৰ কাম চলি থকা বুলি জানিব পৰা গৈছে। লোহাৰ ৰ’ডডালে ৰে’লৰ ডবাখনৰ গ্লাছ ভাঙি খিৰিকীৰ কাষৰ ছিটত বহি থকা হৰিকেশ ডুবেৰ ডিঙিত সোমাই ইপাৰ সিপাৰ হৈ যায়। যাৰ বাবে যুৱকজনৰ ততালিকে মৃত্যু হয়।
আৰক্ষী ঘটনাস্থলীত উপস্থিত হৈ তদন্ত আৰম্ভ কৰে। আৰক্ষীয়ে ইতিমধ্যে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে। ঘটনাটোৰ ফলত বহু সময়ৰ বাবে সেই পথত ৰে’লৰ চলাচল বন্ধ কৰি দিয়া হৈছিল।
Continue Reading
