ডিজিটেল ডেস্কঃ কথাতে আছে জন্ম-মৃত্যু-বিবাহৰ কথা কোনেও ক’ব নোৱাৰে৷ মধ্যপ্ৰদেশৰ এগৰাকী মহিলাই চৰকাৰী এম্বুলেন্সৰ ভিতৰতে একে সময়তে তিনিটাকৈ সন্তানৰ জন্ম দিয়াৰ কথাই এতিয়া চৰ্চা লাভ কৰিছে৷
ৰাজ্য খনৰ ৰাইচেন জিলাৰ চিকিৎসালয়লৈ নিয়াৰ পথতে ২৪ বছৰীয়া মহিলাগৰাকীয়ে এম্বুলেন্সৰ ভিতৰতে তিনিটাকৈ সন্তানৰ জন্ম দিছে । তিনিওটি সন্তান ল'ৰা সন্তান । প্ৰসৱ বেদনা আৰম্ভ হোৱাৰ পিছতে পিপলিয়া গোলী গাঁৱৰ জ্যোতি নামৰ মহিলাগৰাকীক প্ৰথমে গোহাৰগঞ্জ প্ৰাথমিক স্বাস্থ্য কেন্দ্ৰলৈ লৈ যোৱা হৈছিল। পিছত তেওঁক ১০৮ এম্বুলেন্সেৰে ভূপালৰ চৰকাৰী চুলতানিয়া চিকিৎসালয়লৈ প্ৰেৰণ কৰা হৈছিল। কিন্তু চিকিৎসালয় পোৱাৰ আগতেই এম্বুলেন্সতে মহিলাগৰাকীয়ে তিনিটাকৈ সন্তানৰ জন্ম দিয়ে।
এই প্ৰসংগত ড০ সন্দীপ মাৰাণে কয় যে ভূপালৰ পৰা প্ৰায় ২০ কিলোমিটাৰ দূৰত মাণ্ডিদীপৰ ওচৰত তেওঁ এম্বুলেন্সতে সন্তান তিনিটা প্ৰসৱ কৰে। বৰ্তমান মাতৃ আৰু তেওঁৰ তিনিওটা নৱজাতক চুলতানিয়া চিকিৎসালয়ত সুস্থ শৰীৰে আছে৷
Continue Reading
