ডিজিটেল ডেস্কঃ কাজিয়াৰ বাবে , মাৰপিটৰ বাবে কিবা এটা চেলুহে লাগে৷ কেতিয়াবা অতি সাধাৰণ কথাটো মহাযুদ্ধৰ সূচনা হয়৷ তেনে এক ঘটনাই ঘটিছে উত্তৰ প্ৰদেশৰ বাগপটত৷ কইনাঘৰে পৰিবেশন কৰা পনীৰৰ তৰকাৰীত পনীৰ বিচাৰি নোপোৱাৰ পিছতে আৰম্ভ হয় হুলস্থূল৷ সাধাৰণ কথা কটা-কটিয়েই শেষত যুঁজৰ ৰূপ ল’লে৷
নিমিষৰ ভিতৰতে বিবাহ অনুষ্ঠানটো যুদ্ধক্ষেত্ৰলৈ ৰূপান্তৰিত হ'ল! কইনা আৰু দৰাৰ পৰিয়ালৰ সদস্যসকল এই মাৰপিটত জড়িত হৈ পৰিল৷ ঘটনাটো উত্তৰ প্ৰদেশৰ বাগপটত সংঘটিত হৈছে যদিও ঘটনাটোৱে সমগ্ৰ দেশতে আলোড়ণৰ সৃষ্টি কৰিছে৷ বহুতে ঘটনাটোকলৈ চিন্তিত হৈ পৰাৰ লগতে বহুতে আকৌ আমোদো পাইছে৷
মাৰপিটৰ এটা ভিডিঅ' ইতিমধ্যে সামাজিক মাধ্যমত ভাইৰেল হৈ পৰিছে৷ বিবাহস্থলীত উপস্থিত থকা অতিথিসকলক ইজনে সিজনক ঘোঁচা মৰা ভিডিঅ’টোত দেখা গৈছে৷ কেইজনমান আত্মীয়ক হাতত লাঠি আৰু বেল্ট লৈ মাৰপিটত লিপ্ত হোৱা দেখা গৈছে। ঘোঁচা খাই এজন লোক অজ্ঞান হৈ ঢলি পৰাও দেখা গৈছে।কেৱল সেয়াই নহয়, কাজিয়াৰ বাবেই বিবাহস্থলীৰ কাষেৰে যোৱা এটা ব্যস্ত পথ ৭০ মিনিটৰ বাবে বন্ধ হৈ পৰে৷ ভাইৰেল ভিডিঅ'টো ইতিমধ্যে ১৪০,০০ বাৰ মানুহে চাইছে। বহুলোকে টুইটাৰত এই ভিডিঅ'টো শ্বেয়াৰো কৰিছে৷ যোৱা বছৰৰ ১৯ ফেব্ৰুৱাৰীতো বিহাৰৰ পূৰ্ণিয়াত একে ধৰণৰ ঘটনা সংঘটিত হৈছিল।
Continue Reading
