ডিজিটেল ডেস্কঃ বিশ্বৰ পৰা হেৰাই যোৱা বিশাল আকাৰৰ ডাইনোচৰ বোৰে এসময়ত আমাৰ ভাৰততে বিচৰণ কৰি ফুৰিছিল। ভাৰতৰ হাবিৰ মাজে মাজে ঘূৰি ফুৰা ডাইনোচৰৰ বহু অৱশিষ্ট সেয়ে এতিয়াও উদ্ধাৰ হৈ আছে। শেহতীয়াকৈ গৱেষকসকলে মধ্য প্ৰদেশত ডাইনোচৰ কণী আৱিষ্কাৰ কৰিবলৈ সক্ষম হৈছে।
মধ্য প্ৰদেশত আৱিষ্কৃত জীৱাশ্মযুক্ত ডাইনোচৰৰ কণীয়ে এতিয়া বাতৰিৰ শিৰোনাম দখল কৰিছে।
দিল্লী বিশ্ববিদ্যালয়ৰ গৱেষকৰ এটা দলে ডাইনোচৰৰ এই কণী আৱিষ্কাৰ কৰিবলৈ সক্ষম হৈছে। মধ্য প্ৰদেশৰ ধাৰ জিলাত উদ্ধাৰ হোৱা ডাইনোচৰৰ কণীবোৰ চাৰোপড ডাইনোচৰৰ বুলি নিশ্চিত কৰা হৈছে। ই টাইটানোচাৰ গোটৰ অন্তৰ্গত আছিল । মধ্যপ্ৰদেশত ডাইনোচৰৰ কণী আৱিষ্কাৰৰ কথাটো নেচাৰ গ্ৰুপৰ এখন আলোচনী চাইণ্টিফিক ৰিপ'ৰ্টছত প্ৰকাশ পাইছে।
মধ্য ভাৰতৰ বিভিন্ন ঠাইত ইয়াৰ আগতেও ডাইনোচৰ জীৱাশ্ম উদ্ধাৰ হৈছিল। বিজ্ঞানীসকলৰ দলটোৱে শেহতীয়াকৈ মধ্যপ্ৰদেশত টাইটানোচাৰিছ চাৰোপডৰ ৫২ টা বাহ বিচাৰি পাইছে। সেই বাহসমূহৰ ভিতৰৰে এটাত ১০ টা কণী আছিল।
আৱিষ্কাৰটোৱে ডাইনোচৰ আৰু সৰীসৃপৰ মাজৰ সম্পৰ্ক, ডাইনোচৰৰ বাহৰ ধৰণ আৰু ডাইনোচৰৰ প্ৰজননৰ বিষয়ে অধিক তথ্য প্ৰদান কৰিব পাৰিব বুলি আশা কৰা হৈছে।
উল্লেখ্য মেঘালয়তো বিগত বৰ্ষত উদ্ধাৰ হৈছিল কমেও ১০০ মিলিয়ন বছৰৰ পূৰ্বৰ ডাইনোচৰৰ হাঁড় ।
ৰাজ্যখনৰ পশ্চিম খাচি পাহাৰ জিলাত এদল গৱেষকে ডাইনোচৰৰ হাঁড়সমূহৰ ফচিল উদ্ধাৰ কৰিছিল।
জিঅ’ল’জিকেল চাৰ্ভে অৱ ইণ্ডিয়াৰ (জিএছআই) এদল গৱেষকে আৱিষ্কাৰ কৰা ডাইনোচৰৰ হাঁড়সমূহ টাইটানোচৰীয়ান (Titan saurian) পৰিয়ালৰ চাউৰোপ’ড (sauropod) প্ৰজাতিৰ বুলি চিনাক্ত কৰা হৈছিল।
এইধৰণৰ ডাইনোচৰৰ অৱশিষ্ট উত্তৰ পূৱত প্ৰথমবাৰৰ বাবে পোৱা গৈছিল।
ইয়াৰ পূৰ্বে ভাৰতৰ কেৱল গুজৰাট, মধ্যপ্ৰদেশ, মহাৰাষ্ট্ৰ আৰু তামিলনাডুত এইধৰণৰ আৱিষ্কাৰ হৈছিল।
আৱিষ্কাৰটোত ২৫ডালতকৈও অধিক হাঁড়ৰ ভগ্নাংশ পোৱা গৈছিল।
উল্লেখযোগ্য যে চাউৰোপ’ড প্ৰজাতিৰ ডাইনোচৰবিধৰ ডিঙি আৰু নেজ দীঘল, কিন্তু বিশাল শৰীৰৰ অনুপাতে মুখমণ্ডল সৰু।
প্ৰজাতিবিধৰ চাৰিওটা ভৰি একোটা স্তম্ভৰ দৰে বৃহৎ।
Continue Reading
