ডিজিটেল ডেস্কঃ লিঅ’নেল মেছি আৰু ক্ৰিষ্টিয়ানো ৰোনাল্ডো কেইদিনমান পিছত চৌদি আৰৱত এখন প্ৰদৰ্শনী খেলত মুখামুখি হ'ব। এই লৈ চাৰিওফালে যথেষ্ট উত্তেজনাৰ সৃষ্টি হৈছে। বহুতে ইতিমধ্যে টিকটৰ বাবে আবেদন কৰিছে। তেনে সময়তে জনা গ’ল যে এজন চৌদি আৰৱৰ ব্যৱসায়ীয়ে মেছি-ৰোনাল্ডোৰ খেল চাবলৈ ২২ কোটি খৰচ কৰিবলৈ ইচ্ছুক। ইমানখিনি টকাৰ বিনিময়ত তেওঁ টিকট ক্ৰয় কৰিব বিচাৰে।
ব্যৱসায়ীজনৰ নাম মুশ্ৰেফ আল ঘামাদ। তেওঁ চৌদি আৰৱৰ এটা ডাঙৰ ৰিয়েল ইষ্টেট কোম্পানীৰ মুখ্য কাৰ্যবাহী। মেছি-ৰোনাল্ডো খেলৰ টিকটৰ নিলাম ইতিমধ্যে আৰম্ভ হৈছে। নিলাম অহা মঙলবাৰে সমাপ্ত হ'ব। নিলামৰ বিজয়ীজনে বিজয়ী দলটোৰ সৈতে ফটো তোলাৰ সুযোগও পাব। কেৱল সেয়াই নহয়, ড্ৰেছিং ৰুমলৈ গৈ দুয়োটা দলৰ ফুটবলাৰসকলক লগ কৰিবও পাৰিব। ব্যৱসায়ীজনে সেই টিকটটো পাবলৈ নিলামত ২২ কোটি বিড কৰিছিল।
১৯ জানুৱাৰীত মেছি-নেইমাৰ-এমবাপেৰ পেৰিছ ছেইণ্ট জাৰ্মেইনে আৰৱৰ ক্লাব আল হিলাল আৰু ৰোণাল্ডোৰ আল নাছেৰৰ যুগ্ম এটা দলৰ বিৰুদ্ধে এখন প্ৰদৰ্শনী মেচ খেলিব। খেলখন কিং ফাহাদ ষ্টেডিয়ামত অনুষ্ঠিত হ'ব। ইয়াত 68,000 দৰ্শকৰ বাবে আসন আছে। কিন্তু ইতিমধ্যে ২০ লাখ মানুহে টিকটৰ বাবে আবেদন কৰিছে। সেয়ে টিকটসমূহ নিলাম কৰা হৈছে।
মেছি আৰু ৰোনাল্ডো শেষবাৰৰ বাবে ২০২০ চনৰ ডিচেম্বৰত লগ হৈছিল। সেইবাৰ ৰোণাল্ডোৰ জুভেণ্টাছে চেম্পিয়নছ লীগৰ এখন মেচত মেছিৰ বাৰ্চিলোনাক ৩-০ গ'লত পৰাস্ত কৰে।
Continue Reading
