ডিজিটেল ডেস্কঃ এতিয়াৰ পৰা পথৰ কুকুৰৰ ডিঙিত ওলমি থাকিব আধাৰ কাৰ্ড! এই ব্যৱস্থা কৰিছে মুম্বাই পৌৰসভাই। মুম্বাই বিমানবন্দৰৰ বাহিৰত ২০টা অঘৰী কুকুৰে ইতিমধ্যে লাভ কৰিছে নিজাকৈ ‘আধাৰ’ কাৰ্ড। শনিবাৰে পুৱা কুকুৰবিলাকৰ ডিঙিত আধাৰ কাৰ্ড পিন্ধাই দিয়ে প্ৰশাসনে। কুকুৰকেইটাক টিকাকৰণো কৰা হয়।
অঘৰী কুকুৰৰ ডিঙিত বেল্টেৰে লগোৱা হয় ‘আধাৰ’ কাৰ্ড। সেই বেল্টবোৰৰ এটাকৈ QR ক’ড থাকে। কোনোবাই গৈ সেই QR ক’ডটো স্কেন কৰিলে মোবাইলৰ স্ক্ৰীণত কুকুৰটোৰ নাম আৰু জাত ওলাব। কুকুৰটোক টিকা দিয়া হৈছে নে নাই, কুকুৰটোৰ কোনো ৰোগ আছে নে নাই, সেইবোৰো QR ক’ড স্কেন কৰি জানিব পাৰি।
শনিবাৰে ছাত্ৰপতি শিৱাজী মহাৰাজ আন্তঃৰাষ্ট্ৰীয় বিমানবন্দৰৰ টাৰ্মিনেল ১ৰ বাহিৰত অঘৰী কুকুৰক পৰিচয় পত্ৰ বিতৰণৰ কাৰ্যসূচীৰ আয়োজন কৰা হয়। কেইঘণ্টামান দৌৰি ফুৰাৰ অন্তত ২০টা কুকুৰক পৰিচয় পত্ৰ দি খাঁচী কৰা হয়।
পৌৰসভাৰ মতে, অঘৰী কুকুৰৰ সৈতে জড়িত তথ্যকোষ সৃষ্টিৰ বাবে এই পদক্ষেপ গ্ৰহণ কৰা হৈছে। প্ৰথম অৱস্থাত বিমানবন্দৰৰ বাহিৰত থকা ২০টা কুকুৰক পৰীক্ষামূলকভাৱে পৰিচয় পত্ৰ দিয়া হৈছিল যদিও ক্ৰমান্বয়ে সকলো কুকুৰক দিয়া হ’ব।
Continue Reading
