এতিয়াও চলমানে পাহৰিব পৰা নাই কেটৰিনাৰ স্মৃতি! বিকী কৌশলৰ ব্যক্তিগত জীৱন খুঁচৰিবলৈ ভূতৰ ৰূপ ল’ব ভাইজানে

ডিজিটেল ডেস্কঃ চলমান খানে এতিয়াও পাহৰিব পৰা নাই কেটৰিনা কাঈফৰ স্মৃতি! সেয়ে এতিয়া চলমানৰ লক্ষ্য হৈ পৰিছে কেটৰিনাৰ স্বামী বিকী কৌশল। বিকী কৌশলৰ ব্যক্তিগত জীৱন খুঁচৰিবলৈ উঠি পৰি লাগিছে বলিউডৰ ভাইজান!

শেহতীয়াকৈ ৰিয়েলিটি শ্ব’ বিগ বছৰ অনুষ্ঠানত নিজেই এই কথা প্ৰকাশ কৰিছে চলমান খানে। খোদ প্ৰাক্তন প্ৰেমিকা কেটৰিনা কাঈফৰ সন্মুখতে এই পৰিকল্পনা প্ৰকাশ কৰিছে।

অৱশ্যে ব্যংগাত্মকভাৱেহে চলমান খানে এনেদৰে কৈছে। ৰিয়েলিটি শ্ব’ বিগ বছৰ ১৬ নম্বৰ ছিজনৰ এটা অনুষ্ঠানত কেটৰিনা কাঈফে তেওঁৰ শেহতীয়া ছৱি ‘ফোন ভূত’ৰ প্ৰমোচন কৰিবলৈ আহিছিল। তেতিয়া বিগ বছৰ আয়োজক চলমান খানক কেটৰিনাই সোধে যে যদি চলমান খান এটা ভূত হৈ পৰে, তেতিয়া তেওঁ কাক লক্ষ্য কৰি ল’ব।

কেটৰিনাৰ প্ৰশ্নৰ উত্তৰস্বৰূপে চলমানে কয় যে তেওঁ ভূত হ’লে নিশ্চয়কৈ বিকী কৌশলকে লক্ষ্য কৰি ল’ব। বিকী কৌশলৰ ব্যক্তিগত গোপনীয় কথাসমূহ তেওঁ জানিবলৈ চেষ্টা কৰিব।

“এজনেই মানুহ আছে, তেওঁ হৈছে বিকী কৌশল।”- চলমানে কয়। কেটৰিনাই সোধে যে কিয় তেওঁ বিকী কৌশলক লক্ষ্য কৰি ল’ব।

চলমান খানে কয় যে যেতিয়াই বিকী কৌশলৰ কথা কোৱা হয়, কেটৰিনাই লাজ কৰে। সেইবাবেই তেওঁ বিকী কৌশলক লক্ষ্য কৰি লৈছে। লগে লগে কেটৰিনাই ভুৱন ভুলোৱা হাঁহিটো মাৰিব ধৰে।

উল্লেখ্য যে কেটৰিনা আৰু চলমানৰ প্ৰেম কাহিনীয়ে এসময়ত বলিউড গৰম কৰি ৰাখিছিল। কিন্তু দুয়োৰে মাজত বিচ্ছেদ হয়। অৱশেষত যোৱা বৰ্ষৰ ডিচেম্বৰত বিকী কৌশলৰ স’তে বিবাহপাশত আৱদ্ধ হয় মোহময়ী অভিনেত্ৰীগৰাকীয়ে।