ডিজিটেল ডেস্কঃ কাটাৰ বিশ্বকাপৰ সামৰণি পৰিব দেওবাৰে। বিশ্ববিজয়ৰ বাবে যুঁজ চলিব দুই মহাশক্তিধৰ দল ফ্ৰান্স আৰু আৰ্জেণ্টিনাৰ মাজত। লিঅ’নেল মেছি আৰু কিলিয়ান এমবাপেৰ ক্লাছিক এই যুঁজখনৰ সাক্ষী হৈ ৰ’ব ফুটবলপ্ৰেমীসকল।
ফ্ৰান্স আৰু আৰ্জেণ্টিনা- দুয়োখন দেশেই এতিয়ালৈকে দুবাৰকৈ বিশ্বকাপ জয় কৰিছে। এইবাৰ তৃতীয়বাৰৰ বাবে বিশ্বকাপত চুমা দিবলৈ উদ্বাউল হৈ আছে দুয়োটা দল।
ভাৰতীয় সময় অনুসৰি দেওবাৰে সন্ধিয়া ৮.৩০ বজাত ফাইনেলখন খোলোৱা হ’ব। ফাইনেলত অৱতীৰ্ণ হোৱাৰ প্ৰাকমুহূৰ্তত দুয়োটা দলে কেইবাৰ সমুখ সমৰত লিপ্ত হৈছে চাওঁ আহক।
এতিয়ালৈকে ১২ খন মেচত অৱতীৰ্ণ মুখামুখি হৈছে ফ্ৰান্স আৰু আৰ্জেণ্টিনা। ইয়াৰে তিনিখন মেচ বিশ্বকাপৰ। ১২খন মেচৰ ৬খনত বিজয়ী হৈছে আৰ্জেণ্টিনা। ফ্ৰান্স বিজয়ী হৈছে ৩ খনত। আনহাতে, ড্ৰ’ হৈছে ৩ খন মেচ।
১২ খন মেচত আৰ্জেণ্টিনাই গ’ল কৰিছে ১৪টা। ফ্ৰান্সে কৰিছে ১১ টা।
প্ৰথমবাৰ দুয়োটা দল মুখামুখি হৈছিল ১৯৩০ চনৰ ১৫ জুলাইত। বিশ্বকাপৰ মেচখনত ১-০ ব্যৱধানত আৰ্জেণ্টিনা বিজয়ী হৈছিল।
১৯৭৮ চনৰ বিশ্বকাপতো দুয়োটা দল মুখামুখি হয়। তেতিয়াও ২-১ ব্যৱধানত বিজয়ী হয় আৰ্জেণ্টিনা।
শেষবাৰৰ বাবে ২০১৮ চনৰ বিশ্বকাপত দুয়োটা দল মুখামুখি হৈছিল। সেইবাৰ ফ্ৰান্সে পৰাস্ত কৰিবলৈ সক্ষম হয় লিঅ’নেল মেছিৰ আৰ্জণ্টিনাক। ৪-৩ ব্যৱধানত পৰাস্ত হয় আৰ্জেণ্টিনা। মেচখনত কিলিয়ান এমবাপেই দুটাকৈ গ’ল কৰিবলৈ সক্ষম হৈছিল।
এতিয়া, লক্ষ্যণীয় হ’ব ২০২২ চনৰ বিশ্বকাপৰ ফাইনেলত কোনে শেষ হাঁহি মাৰে! কোন বিজয়ী হ’ব- মেছি নে এমবাপে!
