ডিজিটেল ডেস্কঃ ফেব্ৰুৱাৰী মাহৰ ৩ দিন বিনামূলীয়াকৈ তাজমহল চোৱাৰ সুযোগ পাব। সম্ৰাট শ্বাহজাহানৰ ৩৬৯ সংখ্যক উৰছত ৮ ফেব্ৰুৱাৰীত তাজমহলত আন্তঃধৰ্মীয় সম্প্ৰীতিৰ প্ৰতীক ১৫৬০ মিটাৰ (৫১৪৮ ফুট) দীঘল ৰঙীন হিন্দুস্তানী চাদৰ আগবঢ়োৱা হ’ব। উৰ্ছত প্ৰতিবাৰেই চাদৰৰ দৈৰ্ঘ্য বৃদ্ধি পায়। শেষৰ উৰ্ছত ১৪৮০ মিটাৰ দীঘল চাদৰ এখন আগবঢ়োৱা হৈছিল।
৬ ফেব্ৰুৱাৰীত বিয়লি ২ বজাত গুছল ৰীতি-নীতিৰে অনুষ্ঠিত হ’ব শ্বাহজাহানৰ উৰছ। অহা ৭ ফেব্ৰুৱাৰীত দুপৰীয়া ২ বজাত চন্দন আগবঢ়োৱা হ’ব। অহা ৮ ফেব্ৰুৱাৰীত বেডশ্বীটৰ লগতে অনুৰাগীৰ সুবিধা প্ৰদান কৰা হ’ব। তিনিওটা দিনতে সমাধিস্থলত কাৱালী আৰু অন্তিম দিনা আগফালৰ চোতালত খাদ্য বিতৰণ কৰা হ’ব।
খুদ্দাম-ই-ৰোজা কমিটীৰ অধ্যক্ষ হাজী তাহিৰুদ্দিন তাহিৰে কয় যে তিনি দশক পূৰ্বে ৰঙীন হিন্দুস্তানী চাদৰ আগবঢ়োৱাৰ কাম আৰম্ভ হৈছিল। সেই সময়ত ১০০ মিটাৰ দীঘল চাদৰ এখন লগোৱা হৈছিল।
শ্বাহজাহানৰ উৰছৰ সময়ত মূল সমাধিস্থলৰ বেছমেণ্টত অৱস্থিত শ্বাহজাহান আৰু মমতাজৰ সমাধিসমূহ পৰ্যটকৰ বাবে মুকলি কৰা হয়। অধীক্ষক প্ৰত্নতত্ত্ববিদ ড০ ৰাজকুমাৰ পেটেলে কয় যে ৬ আৰু ৭ ফেব্ৰুৱাৰীত বিয়লি ২ বজাৰ পৰা সূৰ্যাস্তলৈকে আৰু ৮ ফেব্ৰুৱাৰীত সূৰ্য্য উদয়ৰ পৰা সূৰ্যাস্তলৈকে পৰ্যটকক তাজমহলত বিনামূলীয়াকৈ প্ৰৱেশৰ সুবিধা প্ৰদান কৰা হ’ব।
Continue Reading
