পদপথ কেৱল পদযাত্ৰীৰ বাবেহে: উচ্চতম ন্যায়ালয়

ডিজিটেল ডেস্কঃ পদপথৰ অধিকাৰ কেৱল পদযাত্ৰীৰহে। উচ্চতম ন্যায়ালয়ে এটা গোচৰত এই ৰায় দিয়ে। ন্যায়াধীশ জে বি পৰ্দিৱালাৰ নেতৃত্বত গঠিত উচ্চতম ন্যায়ালয়ৰ এখন বিচাৰপীঠে এই ৰায় দি কয় যে সংবিধানৰ ২১ নম্বৰ অনুচ্ছেদৰ অধীনত পদযাত্ৰীৰ বাবে পদপথৰ অধিকাৰ সংৰক্ষিত হৈ আছে। ন্যায়ালয়ে ইয়াৰ লগতে পদযাত্ৰীৰ বাবে পদপথ সুৰক্ষিত কৰিবলৈ কেন্দ্ৰীয় চৰকাৰক নীতি-নিৰ্দেশনা প্রস্তুত কৰিবলৈ নিৰ্দেশ দিয়ে।

পদযাত্ৰীৰ সুৰক্ষাৰ সৈতে জড়িত এখন আৱেদনৰ শুনানি লৈ উচ্চতম ন্যায়ালয়ে এই নির্দেশ দিয়ে। ন্যায়ালয়ে কয় যে যদিহে পদযাত্ৰীৰ সুৰক্ষাৰ বাবে কেন্দ্ৰীয় চৰকাৰে নীতি-নিৰ্দেশনা প্রস্তুত নকৰে তেতিয়া উচ্চতম ন্যায়ালয়ে নিজে অধিবক্তাৰ সহযোগত প্রয়োজনীয় ব্যৱস্থা গ্রহণ কৰিব।

উচ্চতম ন্যায়ালয়ে কয় যে নাগৰিকৰ ব্যৱহাৰৰ বাবে পদপথ উপযুক্ত হোৱাৰ প্ৰয়োজন। এই পদপথবোৰ দিব্যাংগ ব্যক্তিৰ বাবেও সহজ হ'ব লাগে। আদালতে লগতে কয় যে পদপথৰ বেদখল আঁতৰোৱা উচিত। দেশৰ সৰ্বোচ্চ আদালতে কয় যে এতিয়ালৈকে পদযাত্ৰীৰ বাবে পদপথৰ অধিকাৰক লৈ কেন্দ্ৰীয় চৰকাৰৰ কোনোধৰণৰ নীতি-নিৰ্দেশনা নাই।

বিচাৰপীঠে কয় যে প্রাক্তন ন্যায়াধীশ অভয় মনোহৰ ছাপ্ৰেৰ নেতৃত্বত এখন কমিটী গঠন কৰা হৈছে আৰু এই কমিটীখনে পথ সুৰক্ষাৰ সৈতে জড়িত বিভিন্ন নির্দেশ কাৰ্যকৰী কৰাটো নিৰীক্ষণ কৰিব। কমিটীখনে এইবুলি কয় যে এবাৰ নীতি-নির্দেশনা প্রস্তুত হৈ উঠিলে ইয়াক কাৰ্যকৰী কৰাৰ ওপৰত চকু ৰাখিব পৰা যাব।

দেশৰ সৰ্বোচ্চ আদালতে কয় যে নাগৰিকৰ বাবে উপযুক্ত পদপথৰ প্ৰয়োজন। ৰাষ্ট্ৰীয় পথ সুৰক্ষা ব'ৰ্ড গঠনৰ বাবে উচ্চতম ন্যায়ালয়ে কেন্দ্ৰীয় চৰকাৰক ছমাহ সময় বান্ধি দিয়ে। ইয়াৰ পাছত অধিক সময় দিয়া নহ'ব বুলিও বিচাৰপীঠে লগতে স্পষ্ট কৰি দিয়ে। উচ্চতম ন্যায়ালয়ে ৰায়টোত গুৰুত্বপূৰ্ণ মন্তব্য দি কয় যে পদযাত্ৰীৰ বাবে পদপথৰ ব্যৱস্থা কৰাৰ প্ৰয়োজন, কিয়নো সেয়া তেওঁলোকৰ মৌলিক অধিকাৰ।

উৎসঃ দৈনিক জনমভূমি