ডিজিটেল ডেস্কঃ ব্ৰাজিলিয়ান ফুটবল তাৰকা ভিনিচিয়াছ জুনিয়ৰ স্পেইনত বৰ্ণবাদৰ বলি হৈছে। দেশখনৰ আগশাৰীৰ ফুটবল ক্লাব ৰিয়েল মাদ্রিদৰ তাৰকাগৰাকীয়ে মালর্কা ক্লাবৰ বিৰুদ্ধে মেচখনত খেলি থকাৰ সময়তে দৰ্শকৰ বৰ্ণবৈষম্যবাদী ঠাট্টা-মস্কৰা শুনিছিল বুলি অভিযোগ উত্থাপন হৈছে।
ভিনিচিয়াছৰ অভিযোগৰ তদন্ত আৰম্ভ কৰিছে স্পেইনৰ ফুটবল এছ’চিয়েশ্যনে। সোমবাৰে সংস্থাটোৱে জনোৱা মতে, ভিনিচিয়াছৰ অভিযোগ কোনো ভিত্তিহীন নহয়। টেলিভিছনত দেখা গ’ল ফুটবলাৰজনক এজন দৰ্শকে 'বান্দৰ’ বুলি ঠাট্টা কৰিছে। অভিযুক্তক চিনাক্ত কৰা হৈছে। সমগ্ৰ বিষয়টো চোৱাচিতা কৰা হৈছে।
দেওবাৰৰ খেলখনত ৰিয়েল মাদ্ৰিদৰ উইংগাৰগৰাকীয়ে হালধীয়া কাৰ্ড লাভ কৰিছিল। মালৰ্কাৰ হাতত ০-১ গ’লত পৰাস্ত হয় ৰিয়েল মাদ্ৰিদো।
উল্লেখ্য যে ভিনিচিয়াছ ইয়াৰ পূৰ্বেও স্পেইনত বৰ্ণবাদৰ বলি হৈছিল। ব্ৰাজিলৰ ফুটবলাৰগৰাকীক যোৱা বছৰ এখন খেলৰ সময়ত এটলেটিকো মাদ্ৰিদ ক্লাবৰ সমৰ্থকসকলে গেলেৰীৰ পৰা 'বান্দৰ’ বুলি অভিহিত কৰিছিল। ফুটবল খেলপথাৰত এনে অবাঞ্চিত ঘটনাক লৈ চিন্তিত হৈ পৰিছে স্পেইনৰ ফুটবল কৰ্তৃপক্ষ।
Continue Reading
