ডিজিটেল ডেস্কঃ পেলেৰ অন্ত্যেষ্টিক্ৰিয়াত চেল্ফী তুলি বিতৰ্কত সোমাই পৰিছে ফিফাৰ সভাপতি গিয়ান্নি ইনফান্তিনো। ফুটবলৰ কিংম্বদন্তিগৰাকীৰ মৃতদেহৰ প্ৰতি সন্মান দেখুওৱাতকৈ চেলফি লোৱাতহে ব্যস্ত হৈ পৰা দেখা গ’ল ইনফান্তিনোক।
প্ৰথমে সকলো ঠিকেই আছিল। ইনফাণ্টিনোৱে পেলেৰ পুত্ৰ আৰু কন্যাক সমবেদনা জ্ঞাপন কৰিছিল। তাৰ পিছতে তেওঁ কিংবদন্তি ফুটবলাৰজনৰ কফিনৰ কাষত থিয় হয়। অসংখ্য ফুটবল অনুৰাগীয়ে পেলেক শেষ শ্ৰদ্ধা জনাবলৈ আহিছিল। বহুতো প্ৰাক্তন ব্ৰাজিলিয়ান ফুটবলাৰো আহিছিল। পেলেৰ কেইবাজনো সতীৰ্থও তেওঁক বিদায় জনাবলৈ আহিছিল।
অভিযোগ কৰা হৈছে যে ফিফাৰ সভাপতিয়ে ব্ৰাজিলৰ বিখ্যাত ফুটবলাৰ আৰু পেলেৰ সতীৰ্থসকলৰ সৈতে চেলফি লয়। এবাৰ নহয়, কেইবাবাৰো চেল্ফী তোলাত ব্যস্ত হৈ পৰে ইনফান্তিনো।
পেলেৰ অনুৰাগীসকল ফিফাৰ সভাপতিগৰাকীৰ আচৰণত ক্ষুব্ধ হৈ পৰিছে। ইয়াৰ দ্বাৰা কিংম্বদন্তিগৰাকীক অপমান কৰা হৈছে বুলি তেওঁলোকে অভিযোগ কৰিছে।
সমগ্ৰ সমালোচনাৰ ওপৰত মুখ খুলিছে ইনফান্তিনোৱে নিজেই। সংবাদমাধ্যমৰ আগত কয়- ''পেলেৰ প্ৰতি মোৰ সদায় যথেষ্ট সন্মান আছে। মই এনে একো কৰা নাছিলো যিয়ে তেওঁক অন্তিম যাত্ৰাৰ সময়ত অসন্মানজনক হ’ব পাৰে।''
উল্লেখ্য যে ২ লাখৰো অধিক লোকে পেলেক শেষ শ্ৰদ্ধা জনাবলৈ চেণ্টোছৰ ভিলা বেলমিৰো ষ্টেডিয়ামত উপস্থিত হৈছিল। ইনফাণ্টিনোৱে কয় যে তেওঁ সকলো ফুটবল খেলা দেশক পেলেৰ নামেৰে এখন ষ্টেডিয়াম নিৰ্মাণ কৰিবলৈ অনুৰোধ কৰিব।
Continue Reading
