গাহৰিৰ হৃদযন্ত্ৰ লৈ ২ মাহ জীয়াই থাকিল ডেভিড বেনেট;অৱশেষত সাবটিলে মৃত্যু

ডিজিটেল ডেস্কঃ দুমাহ পূৰ্বে এটা খবৰে বিশ্বজুৰি চৰ্চা লাভ কৰিছিল। চিকিৎসা বিজ্ঞানে লাভ কৰিছিল এক অভূতপূৰ্ব সাফল্য। প্ৰথমবাৰৰ বাবে ইতিহাস সৃষ্টি কৰি মানৱ দেহত সফলতাৰে সংৰোপণ কৰা হৈছিল গাহৰিৰ হৃদযন্ত্ৰ। আমেৰিকা যুক্তৰাষ্ট্ৰৰ চিকিৎসকসকলে মেৰিলেণ্ডত ডেভিড বেনেট নামৰ এজন ৰোগীৰ দেহত গাহৰিৰ হৃদযন্ত্ৰ সংৰোপণ কৰাৰ পাছত ৫৭ বছৰীয়া ৰোগীজন আৰোগ্য হৈ উঠিছিল। কিন্তু দুখৰ খবৰ যে এইগৰাকী ডেভিড বেনেটে দেহত গাহৰিৰ হৃদপিণ্ড লৈ দীৰ্ঘদিন জীয়াই নাথাকিল। বুধবাৰে তেওঁ মৃত্যুক আঁকোৱালি লয়। আমেৰিকা যুক্তৰাষ্ট্ৰৰ মেৰিলেণ্ড চিকিৎসা কেন্দ্ৰই ডেভিড বেনেটৰ মৃত্যুৰ কথা ঘোষণা কৰিছে।যোৱা কেইবাদিনো ধৰি তেওঁৰ স্বাস্থ্যৰ অৱনতি ঘটিছিল। চিকিৎসকসকলে মৃত্যুৰ সঠিক কাৰণ এতিয়াও ঘোষণা কৰা নাই। উল্লেখ্য যে, ডেভিডৰ দেহত গাহৰিৰ হৃদযন্ত্ৰ ৰোপণ কৰাৰ পিছত মেৰিলেণ্ড চিকিৎসালয়ে দাবী কৰিছিল যে তেওঁৰ দেহত সংৰোপণ কৰা গাহৰিৰ হৃদযন্ত্ৰই নিখুঁতভাৱে কাম কৰি আছে। মেৰিলেণ্ড চিকিৎসালয়ে সময়ে সময়ে তেওঁৰ স্বাস্থ্যৰ আপডেট জাৰি কৰিছিল আৰু তেওঁ সুস্থ আছে বুলি প্ৰকাশ কৰি আহিছিল। মানৱ দেহত অংগৰ অভাৱ দূৰ কৰিবলৈ জন্তুৰ অংগ সংৰোপন কৰিব পৰা বিষয়টো এক মাইলৰ খুটি হৈ ৰ'ব বুলি দাবী কৰিছিল আমেৰিকাৰ চিকিৎসকসকলে। ডেভিড বেনেটৰ মৃত্যু হ'ল যদিও তেওঁৰ পুত্ৰই চিকিৎসা বিজ্ঞানৰ এই সম্পৰীক্ষাই আগন্তুক সময়ত মানৱ জাতিৰ কল্যাণ সাধন কৰিব বুলি আশা প্ৰকাশ কৰিছে। আৰু পঢ়কঃ পুৱা ৮ বজাৰ পৰা আৰম্ভ মণিপুৰ নিৰ্বাচনৰ ভোট গণনা;নিৰ্ণয় হ’ব ৯২ গৰাকী প্ৰাৰ্থীৰ ভাগ্য