গান্ধী পৰিয়ালত সংঘাতৰ সৃষ্টি কৰাৰ পাং! ৰায়বৰেলীৰ পৰা যুঁজিবলৈ বিজেপিয়ে আগবঢ়োৱা প্ৰস্তাৱ নাকচ বৰুণ গান্ধীৰ

  পিলিভিটৰ সলনি বৰুণ গান্ধীক ৰায়বৰেলীৰ পৰা বিজেপিয়ে টিকট দিব বিচৰাৰ কথাই ঘৰৰ ভিতৰতে কাজিয়া লগাবলৈ গেৰুৱা বাহিনীয়ে চেষ্টা চলোৱা বুলি বহুতে আলোচনা কৰিছে। বৰুণ গান্ধীয়ে হয়তো ঘৰৰ মানুহৰ বিৰুদ্ধে ৰণত নামিবলৈ ইচ্ছা নথকাৰ বাবেই বিজেপিৰ সেই প্ৰস্তাৱ মানি লোৱা নাই বুলি বহুতে ধাৰণা কৰিছে। এইক্ষেত্ৰত  বৰুণে  সন্মতি দিব বুলি  বিজেপি আশাবাদী হোৱাৰ এটা কাৰণ হয়তো আছিল যে তেওঁৰ মাতৃ মানেকা গান্ধীয়ে ১৯৮৪ চনৰ নিৰ্বাচনত প্ৰিয়ংকা গান্ধীৰ পিতৃ ৰাজীৱ গান্ধীৰ বিৰুদ্ধে যুঁজ দিছিল। প্ৰাক্তন কংগ্ৰেছ অধ্যক্ষ ছোনিয়া গান্ধীয়ে একেৰাহে চাৰিবাৰ দখল কৰিছিল  ৰায়বৰেলী।  এইবাৰ ছোনিয়াই ৰাজ্যসভালৈ নিৰ্বাচিত হোৱা বাবে  সেই আসনত কংগ্ৰেছে কাক প্ৰক্ষেপ কৰিব তাকেলৈ আলোচনা হৈ আছে।  

যদিও কংগ্ৰেছে আমেঠি বা ৰায়বৰেলীৰ প্ৰাৰ্থীৰ নাম  ঘোষণা কৰা নাই, কংগ্ৰেছ সভাপতি মল্লিকাৰ্জুন খাৰ্গেই শেহতীয়া এক সাক্ষাৎকাৰত দাবী কৰিছে যে দুয়োখন আসনৰ বাবে "আচৰিত" কিবা এটা ঘোষণা কৰা হ'ব পাৰে। ছোনিয়াৰ পূৰ্বে  প্ৰাক্তন প্ৰধানমন্ত্ৰী ইন্দিৰা গান্ধীয়ে তিনিবাৰ ৰায়বৰেলীৰ পৰা জয়ী হৈছিল। আসনখনৰ পৰা  ইন্দিৰাৰ স্বামী ফিৰোজ গান্ধীও দুবাৰকৈ নিৰ্বাচিত হৈছিল। সেয়েহে, কংগ্ৰেছে এই পাৰিবাৰিক দুৰ্গৰ পৰা প্ৰতিদ্বন্দ্বিতা  কৰিবলৈ এজন 'গান্ধী' পৰিয়ালৰ লোককে বিচাৰে বুলি বহুতে  ধাৰণা কৰিছে। এইক্ষেত্ৰত  প্ৰিয়ংকা দৌৰত আগবাঢ়ি আছে বুলি অনুমান কৰা হৈছে। জ্যেষ্ঠ কংগ্ৰেছ নেতা  এ কে এণ্টনিয়েও তেনে ইংগিত দিছে।  ৰায়বৰেলী কংগ্ৰেছৰ দুৰ্গ  বুলি জনাৰ পিছতো বিজেপিয়ে কিয় গান্ধী পৰিয়ালৰে বৰুণ গান্ধীক ৰায়বৰেলীৰ পৰা প্ৰক্ষেপ কৰাৰ প্ৰস্তাৱ দিছে সেয়া বহুতৰে বাবে এক সাঁথৰ হৈ পৰিছে। ভায়ে ভায়ে কাজিয়া লগোৱাৰ বাবেই বিজেপিয়ে এনে প্ৰস্তাৱ দিয়া নাইতো বুলি বহুতৰে মনত প্ৰশ্নৰ উদয় হৈছে।