ডিজিটেল ডেস্কঃ কৰ্ণাটকত দূৰ্দান্ত বিজয় সাব্যষ্ট কৰাৰ পাছতে ৰাহুল গান্ধীক ভূয়সী প্ৰশংসা কৰিছে দক্ষিণৰ ছুপাৰষ্টাৰ কমল হাছানে। গান্ধীক অভিনন্দন জনাই ছুপাৰষ্টাৰগৰাকীয়ে কয় যে মহাত্মা গান্ধীৰ পথেই ৰাহুলে আঁকোৱালি লৈছে।
উল্লেখ্য যে শেহতীয়াকৈ ৰাজনীতিৰ পথাৰতো কমল হাছানে খোজ পেলাইছে। ৰাহুল গান্ধীৰ 'ভাৰত জোড়ো যাত্ৰা’তো অংশগ্ৰহণ কৰিছিল অভিনেতাজনে।
কৰ্ণাটকত কংগ্ৰেছে বিজয়সাব্যষ্ট কৰাৰ পাছতে 'ভাৰত জোড়ো যাত্ৰা’ক প্ৰশংসা কৰি কমল হাছানে কয় যে এই যাত্ৰাৰ জৰিয়তে ৰাহুল গান্ধীয়ে দেশৰ জনসাধাৰণৰ হৃদয়ত সোমাই পৰিছিল। লগতে দেখুৱাইছিল যে প্ৰেম আৰু নম্ৰতাৰ জৰিয়তে পৃথিৱীৰ ক্ষমতাশালীসকলক জোকাৰি যাব পাৰি।
হাছানে টুইটাৰত কয়- ''গান্ধীজীৰ দৰেই আপুনিও জনসাধাৰণৰ হৃদয়ত সোমাই পৰিল আৰু তেওঁৰ দৰেই আপুনি প্ৰদৰ্শন কৰিলে যে আপোনাৰ প্ৰেম, মানৱীয়তা আৰু নম্ৰ কৌশলেৰে আপুনি পৃথিৱীৰ ক্ষমতাশালীসকলক জোকাৰি যাব পাৰে। জনসাধাৰণৰ বাবে এয়া এক বিশুদ্ধ বতাহৰ উশাহ।’’
“আপুনি কৰ্ণাটকৰ জনসাধাৰণক সাম্প্ৰদায়িক বিভাজনক প্ৰত্যাখ্যান কৰিবলৈ কৈছিল, তেওঁলোকেও আপোনাৰ ওপৰত বিশ্বাস ৰাখি ঐক্যবদ্ধভাৱে প্ৰত্যাখ্যান কৰে। কেৱল বিজয়ৰ বাবেই নহয়, বিজয়ৰ ধৰণৰ বাবেও অভিনন্দন!”- কমল হাছানে লগতে কয়।
Continue Reading
