গাঞ্জাসেৱন কৰিলে অস্ত্ৰোপচাৰৰ পাছত বেছি বিষ হয়! আমেৰিকা যুক্তৰাষ্ট্ৰৰ গৱেষকৰ দাবী

ডিজিটেল ডেস্কঃ আপুনি গাঞ্জা সেৱন কৰে নেকি? তেন্তে আপোনাৰ বাবে এটা দুঃখবৰ আছে। আপোনাৰ যদি কিবা অস্ত্ৰোপচাৰ হয়, তেন্তে আপুনি স্বাভাৱিক বিষতকৈ বেছি বিষ অনুভৱ কৰিব।

আমেৰিকা যুক্তৰাষ্ট্ৰৰ এখন হস্পিতালত এই বিষয়ে এটা সমীক্ষা চলোৱা হৈছিল। প্ৰায় চৌত্ৰিশ হেজাৰ অস্ত্ৰোপচাৰ হৈ যোৱা ৰোগীক লৈ কৰা এই সমীক্ষাটোত ১৬৭৯জনে নিয়মীতভাৱে গাঞ্জা সেৱন কৰে বুলি জানিব পৰা গৈছে।

গাঞ্জাসেৱন কৰা প্ৰত্যেকেই অস্ত্ৰোপচাৰৰ ২৪ ঘণ্টাৰ ভিতৰত অসহনীয় বিষ অনুভৱ কৰিছিল। গাঞ্জাসেৱন কৰাৰ বাবেই তেওঁলোকৰ এই বিষ হৈছিল বুলি সমীক্ষকসকলে ক’ব বিচাৰে।

উল্লেখ্য যে আমেৰিকাত গাঞ্জাক দীৰ্ঘস্থায়ী বিষৰ ঔষধ হিচাপে ব্যৱহাৰ কৰা হৈ আহিছে। কিন্তু অস্ত্ৰোপচাৰৰ বিষত গাঞ্জাই বিপৰীত ভূমিকাত অৱতীৰ্ণ হোৱাৰ বিষয়ে জানিব পাৰি ইতিমধ্যে ইয়াক লৈ তীব্ৰ চৰ্চা চলিছে।

কিন্তু কেৱল গাঞ্জাই নহয়, চিগাৰেট সেৱন কৰিলেও এনেধৰণৰ সমস্যাই দেখা দিয়ে। অস্ত্ৰোপচাৰৰ পূৰ্বে এনাষ্টেছিয়া দিলে অৱশ্যে এনে নহ’ব পাৰে বুলিও জনাইছে চিকিৎসকসকলে।

আমেৰিকাৰ চেণ্টাৰ ফৰ ডিজিজ কণ্ট্ৰ’ল এণ্ড প্ৰিভেন্চনৰ তথ্য অনুসৰি, অতিৰিক্ত মাদক দ্ৰব্য সেৱনৰ ফলত যোৱা বৰ্ষত দেশখনত এক লাখৰো অধিক লোকৰ মৃত্যু হৈছে।