ডিজিটেল ডেস্কঃ অনলাইন লুডো খেলি প্ৰেমত পৰিল এজন ভাৰতীয় যুৱক আৰু এজনী পাকিস্তানী কিশোৰী! হয়, শুনিবলৈ আচৰিত লাগিলেও এই ঘটনাটোৱে বাতৰিৰ শিৰোনামা দখল কৰিছে।
জানিব পৰামতে, উত্তৰ প্ৰদেশৰ এজন যুৱকৰ স’তে লুডো খেলি প্ৰেমত পৰে এজনী পাকিস্তানী কিশোৰী। প্ৰেমৰ তাৰণাত পৰিয়ে তাই পাকিস্তানৰ পৰা সীমান্ত পাৰ হৈ আহে আৰু যুৱকজনৰ স’তে একেলগে থাকিবলৈ লয়। বাংগালুৰুত তেওঁলোকে সংসাৰ আৰম্ভ কৰিবলৈ লয়।
কিন্তু প্ৰেমৰ সফল সমাপ্তিৰ পৰিৱৰ্তে তেওঁলোকক ৰঙাঘৰলৈ পঠোৱা হৈছে। সোমবাৰে বেংগালুৰু আৰক্ষীয়ে ভাৰতত অবৈধভাৱে প্ৰৱেশ আৰু বাস কৰাৰ অভিযোগত ইক্ৰা জিৱানী নামৰ এগৰাকী ১৯ বছৰীয়া কিশোৰীক গ্ৰেপ্তাৰ কৰে। উত্তৰ প্ৰদেশৰ বাসিন্দা ২৬ বছৰীয়া মুলায়ম সিং যাদৱকো দেশত আশ্ৰয় দিয়াৰ অভিযোগত গ্ৰেপ্তাৰ কৰা হৈছে।
বেংগালুৰু আৰক্ষীয়ে জনোৱা অনুসৰি, ইক্ৰা জিৱানীয়ে মিছা তথ্য লৈ নেপাললৈ যোৱাৰ পথত ভাৰতত প্ৰৱেশ কৰিছিল। ৰাজ্যিক আইবিয়ে গোপন সূত্ৰৰ পৰা জানিব পাৰিছিল যে এগৰাকী পাকিস্তানী ছোৱালী বৈধ নথিপত্ৰ অবিহনে চহৰলৈ আহিছে। তাৰপাছতে জনা ঘ’ল যে ইক্ৰাই কেইমাহমান আগতে মুলায়মৰ সৈতে এটা অনলাইন গেমিং এপৰ জৰিয়তে পৰিচয় হৈছিল। উত্তৰ প্ৰদেশৰ বাসিন্দা মুলায়মে প্ৰায় সাত বছৰ ধৰি বাংগালুৰুত বাস কৰি আছিল। তেওঁ এটা সুৰক্ষা সংস্থাত কৰ্মৰত।
লুডো খেলি থাকোতেই দুয়ো প্ৰেমত পৰে। আৰক্ষীয়ে জনায় যে জিৱানী পাকিস্তানৰ বাসিন্দা বুলি মুলায়েমে গম পোৱা নাছিল। পিছতহে তেওঁ জানিব পাৰিলে যে পাকিস্তানৰ হায়দৰাবাদৰ বাসিন্দা ইক্ৰা। প্ৰেমত পৰা মুলায়মে ইক্ৰাক নেপালৰ কাঠমাণ্ডুলৈকে আহিবলৈ কয়। মুলায়মও কাঠমাণ্ডুলৈ গৈছিল। তাত তেওঁলোকে হিন্দু ধৰ্ম অনুসৰি বিবাহো কৰিছিল। তাৰ পিছত তেওঁলোক দুয়ো বিহাৰলৈ পলাই গৈছিল।
যোৱা বছৰৰ ২৮ ছেপ্টেম্বৰত নৱদম্পতি হালে বাংগালুৰুলৈ উভতি আহিছিল। সেই সময়লৈ ইক্ৰা জীৱানীৰ নাম সলনি কৰি আধাৰ কাৰ্ডত ৰাভা যাদৱ ৰখা হৈছিল। তেওঁলোকে বেংগালুৰুৰ চাৰ্জাপুৰ ৰোডত এজন গোবিন্দা ৰেড্ডীৰ ঘৰত ভাড়াত বাস কৰিবলৈ আৰম্ভ কৰিছিল।
Continue Reading
