ডিজিটেল ডেস্কঃ খালিস্তানী নেতা অমৃতপাল সিঙৰ নতুন ঠিকনা হ’ব ডিব্ৰুগড়ৰ কেন্দ্ৰীয় কাৰাগাৰ৷ দেওবাৰে পুৱতি নিশা খালিস্তানী নেতা অমৃতপাল সিঙে গুৰুদ্বাৰত আত্মসমৰ্পন কৰাৰ পিছতে তেওঁক গ্ৰেপ্তাৰ কৰা হৈছিল৷ অমৃতপালৰ পত্নী কিৰণদীপক তিনিদিন আগতে লণ্ডনলৈ যাৱলৈ ওলোৱাৰ সময়ত অমৃতসৰ বিমানবন্দৰত আটক কৰা হৈছিল৷শুল্ক বিভাগৰ বিষয়াই তেওঁক আটক কৰি জেৰা আৰম্ভ কৰিছিল৷ পৰৱৰ্তী সময়ত সতৰ্কতামূলক ব্যৱস্থা হিচাপে তেওঁক আৰক্ষীৰ জিম্মালৈ প্ৰেৰণ কৰা হৈছিল৷
অৱশেষত দেওবাৰে পুৱতি নিশা খলিস্তানী নেতা অমৃতপাল সিঙে গুৰুদ্বাৰালৈ আহি আৰক্ষীৰ সন্মুখত আত্মসমৰ্পণ কৰে। অমৃতপালক ৰাষ্ট্ৰীয় সুৰক্ষা আইনৰ অধীনত গ্ৰেপ্তাৰ কৰা হৈছে।আত্মসমৰ্পনৰ পিছতে অমৃতপাল সিঙক ভাটিণ্ডাৰ বায়ুসেনাৰ ঘাটিলৈ নিয়া হয়৷ সংবাদ প্ৰতিষ্ঠান এএনআইৰ বাতৰি অনুসৰি বৰ্তমান অমৃতপাল সিঙক অসমৰ ডিব্ৰুগড়লৈ আনি থকা হৈছে৷
উল্লেখ্য ইয়াৰ পূৰ্বেও কেইবাজনো পৃথক খালিস্তানৰ দাবীৰ প্ৰতি সহানুভূতিশীল আৰু 'ৱাৰিছ পাঞ্জাৱ দে'ৰ মুৰব্বী অমৃতপাল সিঙৰ অনুগত লোকক ডিব্ৰুগড়ৰ কাৰাগাৰলৈ অনা হৈছে৷ প্ৰথমাৱস্থাত চাৰিজন খালিস্তানী সমৰ্থকক ডিব্ৰুগড়লৈ অনা হৈছিল৷ পিছত সেই সংখ্যা আৰু বৃদ্ধি পায়৷ বায়ুসেনাৰ বিশেষ বিমানেৰে তেওঁলোকক পঞ্জাৱৰ পৰা ডিব্ৰুগড়লৈ অনা হৈছিল৷
খালিস্তানী সমৰ্থকৰ প্ৰথম দলটোৰ সৈতে পঞ্জাৱ আৰক্ষীৰ ২৭ জনীয়া দল এটাও অসমলৈ আহিছিল৷পঞ্জাৱ আৰক্ষীয়ে পূৰ্বে প্ৰকাশ কৰা মতে অমৃতপাল সিঙৰ নেতৃত্বত থকা সংগঠনটোৰ ৭৮ জনতকৈও অধিক সদস্যক গ্ৰেপ্তাৰ কৰা হৈছে৷
Continue Reading
