ডিজিটেল ডেস্কঃ লোকসভাৰ সাংসদ পদ কৰ্তন হোৱাৰ পিছতে কালি ৰাহুল গান্ধীলৈ প্ৰেৰণ কৰা হৈছিল চৰকাৰী বাংলো এৰাৰৰ জাননী। এই জাননী পোৱাৰ পিছতে ৰাহুল গান্ধীয়ে নিজৰ মন্তব্য জনাই লোকসভাৰ সচিবালয়লৈ এখন পত্ৰ প্ৰেৰণ কৰিছে। পত্ৰ খনত তেওঁ চৰকাৰী আদেশ মানি তোঘলক ৰোডৰ চৰকাৰী বাংলোটো এৰি দিব বুলি কৈছে।ৱায়ানাডৰ প্ৰাক্তন সাংসদজনে লোকসভা সচিবালয়ক বাংলো এৰি যাবলৈ নিৰ্দেশ দি পত্ৰ প্ৰেৰণ কৰাৰ বাবে ধন্যবাদ জনাইছে।
লোকসভাৰ গৃহ নিৰ্মাণ সমিতিয়ে প্ৰেৰণ কৰা জাননী লাভ কৰাৰ পিছত ৰাহুলে লিখা এখন পত্ৰত কয় , "জনসাধাৰণৰ ইচ্ছাত চাৰিটা কাৰ্যকালৰ বাবে সংসদৰ সদস্য হিচাপে মই ইয়াত ভালদৰেই সময় অতিবাহিত কৰিছিলো। মোৰ স্মৃতিবোৰো ইয়াত নিহিত হৈ আছে। মই পত্ৰখনৰ নিৰ্দেশনাবোৰ গ্ৰহণ কৰিম। ''
সোমবাৰে লোকসভাৰ গৃহ নিৰ্মাণ সমিতিয়ে কংগ্ৰেছ নেতাজনক এমাহৰ ভিতৰত তেওঁৰ চৰকাৰী বাংলো খালী কৰি দিবলৈ জাননী জাৰি কৰিছিল। ৰাহুল ২০০৪ চনৰ পৰা লোকসভাৰ সাংসদ হৈ আছিল। সেয়েহেনিয়ম অনুসৰি ৰাহুলৰ বাবে দিল্লীৰ ১২ তোঘলক লেনত চৰকাৰী বাংলোটো আৱণ্টন কৰা হৈছিল। তেওঁ ২০০৫ চনৰ পৰা বাংলোটোত বাস কৰি আহিছে।
কিন্তু চুৰাটৰ জিলা আদালতে তেওঁৰ মোদী-মন্তব্যৰ বাবে তেওঁক দুবছৰৰ কাৰাদণ্ড বিহাৰ পিছতে ৰাহুলৰ সাংসদ পদ কৰ্তন কৰা হৈছে। ২৩ মাৰ্চত তেওঁক লোকসভাৰ অধ্যক্ষ ওম বিৰলাই সাংসদ পদৰ পৰা বৰ্খাস্ত কৰিছিল।কিন্তু চৰকাৰী ঘৰ এৰি ৰাহুলে ক’ত থাকিবলৈ ল’ব? কাৰণ ৰাহুল গান্ধীৰ নিজৰ বুলিবলৈ কোনো ঘৰ নাই। বহুতে ধাৰণা কৰিছে যে ছোনিয়া-পুত্ৰই তোঘলক ৰোডৰ বাংলোটো খালী কৰাৰ পিছত মাতৃ ছোনিয়া গান্ধীৰ ১০ জনপথত থকা চৰকাৰী বাংলোতে থাকিবলৈ ল’ব পাৰে।
Continue Reading
