ডিজিটেল ডেস্কঃ স্কুলৰ পৰা ঘৰলৈ উভতি অহাৰ পথত মৃত্যুক আঁকোৱালি লয় এজন ১২ বছৰীয়া ছাত্ৰই। হাৰ্ট এটেকত মৃত্যু হয় ছাত্ৰজনৰ। মধ্যপ্ৰদেশৰ ভিন্দত সংঘটিত হৈছে এই শোকাৱহ ঘটনা।
আৰক্ষীৰ মতে, বিদ্যালয়ৰ পৰা ওলাই অহাৰ কিছু সময়ৰ পূৰ্বে ভুক্তভোগী ছাত্ৰজনে ভাতৃৰ সৈতে খাদ্য গ্ৰহণ কৰিছিল। ইয়াৰ পিছত তেওঁ ঘৰলৈ উভতি যাবলৈ স্কুল বাছত উঠিল। স্কুল বাছত বহি থকাৰ কিছু সময়ৰ পাছতে ছাত্ৰজন আসনৰ পৰা বাগৰি পৰে। বাছখনত থকা কৰ্মচাৰীসকলে লগে লগে বিদ্যালয় প্ৰশাসনক এই বিষয়ে অৱগত কৰে।
ইয়াৰ পিছত শিশুটিক ওচৰৰ চিকিৎসালয়ত ভৰ্তি কৰা হয়। য'ত চিকিৎসকৰ দলে তেওঁক মৃত ঘোষণা কৰে। চিকিৎসকৰ মতে, এতিয়ালৈকে হাৰ্ট এটেকৰ আটাইতকৈ কম বয়সীয়া ৰোগীৰ ভিতৰত এয়া অন্যতম।
আৰক্ষীয়ে নিহত ছাত্ৰজনক মনীষ জাটাভ বুলি চিনাক্ত কৰিছে। মনীষ চতুৰ্থ শ্ৰেণীৰ ছাত্ৰ আছিল। মনীষৰ লগতে ভায়েকেও একেখন স্কুলতে পঢ়া-শুনা কৰিছিল।
মনীষক পৰীক্ষা কৰা ডাঃ অনিল গোৱালে পিটিআইক জনোৱা মতে, চিকিৎসালয়লৈ অনাৰ সময়লৈকে মনীষৰ ইতিমধ্যে মৃত্যু হৈছে। অৱশ্যে আমি তেওঁক চিপিআৰ দিলোঁ যদিও কোনো কামত নাহিল। এতিয়ালৈকে পৰীক্ষা কৰি যিখিনি পোৱা গৈছে সেই অনুসৰি এই ঘটনা হাৰ্ট এটেকৰ বুলিয়ে অভিহিত কৰিছে চিকিৎসকৰ দলে।
Continue Reading
