ডিজিটেল ডেস্কঃ প্ৰচণ্ড গৰমৰ পৰা পৰিত্ৰাণ পাবলৈ বহুতে বহুতো পদ্ধতি গ্ৰহণ কৰে। কিছুমান মানুহে এয়াৰ কণ্ডিচনাৰৰ ওপৰত নিৰ্ভৰ কৰে। কিছুমান মানুহে নিজৰ ঘৰ বা গাড়ীৰ চাদত প্ৰাকৃতিক ঘাঁহৰ আৱৰণ সৃষ্টি কৰি ৰ’দৰ তীব্ৰ উত্তাপৰ পৰা ৰক্ষা পৰে।
কিন্তু শেহতীয়াকৈ এজন মানুহে এটা কাণ্ড কৰিছে, যিটো অত্যন্ত নতুন! মানুহজনে নিজৰ গাড়ীখনৰ বাহিৰৰ অংশটো গোবৰেৰে লেপি লৈছে, যাতে ভিতৰখন ঠাণ্ডা হৈ থাকে। তাৰ ছবিখন ছচিয়েল মিডিয়াত বিয়পি পৰিছে।
মধ্য প্ৰদেশত সংঘটিত হৈছে এই ঘটনা। পেছাত হোমিঅ’পেথিক চিকিৎসক সুশীল সাগৰে এই কাণ্ড কৰিছে। তেওঁ কয়- ''গৰমত উষ্ণতা বৃদ্ধি হ’লে গাড়ীৰ মূৰৰ ওপৰত থকা ধাতুৰ তৰপটোও গৰম হৈ পৰে। গতিকে গাড়ীৰ বাহিৰৰ ফালে এই গোবৰৰ আৱৰণ ৰাখিলে আভ্যন্তৰীণ জলবায়ু বহুত ঠাণ্ডা কৰি ৰখাত সহায় কৰে। তেল খৰচ কৰি গাড়ীৰ এচি অন নকৰাকৈ গাড়ীখন ঠাণ্ডা কৰি ৰাখিব পাৰি।"
গ্ৰামাঞ্চলত মাটিৰে লেপা ঘৰবোৰ ঠাণ্ডা কৰি ৰাখিবলৈ বেৰ বা মজিয়া গৰুৰ গোবৰেৰে ঢাকি ৰখাৰ প্ৰথা আছে। কিন্তু গাড়ীৰ ওপৰত গোবৰৰ ক্ষেত্ৰখন সঁচাকৈয়ে বেলেগ। সুশীলে কয়, “এই আৱৰণ লগোৱাৰ পিছত অত্যন্ত গৰমতো গাড়ীৰ এচি সোনকালে ঠাণ্ডা হৈ যায়, তেলৰো ৰাহি হয়। গাড়ীখন যদি ধুই বা বৰষুণ দিয়া নহয়, তেন্তে এটা আৱৰণেৰে একেৰাহে দুমাহলৈকে কাম কৰিব।”
Continue Reading
