গণবিদ্ৰোহৰ পৰা বাচিবলৈ এতিয়াও অজ্ঞাতবাসতে কানাডাৰ প্ৰধানমন্ত্ৰী

ডিজিটেল ডেস্ক: ক’ভিড প্ৰতিৰোধৰ বাবে কানাডা চৰকাৰে ভেকচিন গ্ৰহণ বাধ্যতামূলক কৰাৰ পাছতে দেশখনত সৃষ্টি হৈছে অভূতপূৰ্ব পৰিস্থিতিৰ৷ চৰকাৰৰ কঠোৰ ক’ভিডবিধিৰ বিৰুদ্ধে দেশখনৰ ট্ৰাকচালক আৰু জনসাধাৰণ ক্ষোভত ফাটি পৰিছে৷ পৰিস্থিতি এনে পৰ্যায় পাইছেগৈ প্ৰতিবাদৰ মুখামুখি হোৱাৰ ভয়ত অজ্ঞাত স্থানত আত্মগোপন কৰিছে দেশখনৰ প্ৰধানমন্ত্ৰী জাষ্টিন ট্ৰুডোৱে৷ কানাডা চৰকাৰে ট্ৰাক চালকৰ বাবে ভেকচিন বাধ্যতামূলক কৰাত জাঙুৰ খাই উঠিছে ট্ৰাকচালকসকল৷ শনিবাৰে ৰাজধানী অটোৱাত হাজাৰ হাজাৰ লোকে চৰকাৰৰ এই ক’ভিড নীতিৰ বিৰুদ্ধে প্ৰতিবাদ সাব্যস্ত কৰে আৰু ২০ হাজাৰ ট্ৰাকেৰে ৫০ হাজাৰ প্ৰতিবাদকাৰীয়ে ঘেৰাও কৰিলে প্ৰধানমন্ত্ৰী ট্ৰুডোৰ চৰকাৰী বাসভৱন৷ ২০ হাজাৰ ট্ৰাকেৰে ৫০ হাজাৰ প্ৰতিবাদকাৰীয়ে বাসভৱনৰ বাহিৰত সমবেত হৈ প্ৰতিবাদ আৰম্ভ কৰাৰ পাছত তৎমুহূৰ্ততে সেই স্থানৰ পৰা পৰিয়ালসহ পলায়ন কৰে দেশখনৰ প্ৰধানমন্ত্ৰী জাষ্টিন ট্ৰুডোৱে৷ নিৰাপত্তাজনিত শংকা আৰু প্ৰতিবাদৰ মুখামুখি হোৱাৰ সাহসহীনতাৰ বাবেই প্ৰধানমন্ত্ৰী আৰু তেওঁৰ পৰিয়ালে আশ্ৰয় লৈছে কোনো গোপন স্থানত৷ অভিযোগ অনুসৰি, ট্ৰাকচালকসকলৰ বাবে বাধ্যতামূলক ভেকচিনৰ নীতি প্ৰৱৰ্তন কৰাৰ পাছত ট্ৰাকচালকসকলৰ কাম-কাজ ব্যাহত হৈ পৰিছে৷ আমেৰিকালৈ অহা-যোৱা কৰা ট্ৰাকচালকসকলৰ বাবে ক’ভিডৰ ভেকচিন বাধ্যতামূলক কৰাৰ পাছতেই এই গণপ্ৰতিবাদৰ আৰম্ভণি হয়৷ কানাডা চৰকাৰৰ কৰ’না সম্পৰ্কীয় বিভিন্ন নিষেধাজ্ঞাৰ বিৰুদ্ধে ট্ৰাকচালকসকলে আৰম্ভ কৰা এই আন্দোলনক ‘ফ্ৰীডম কনভয়’ হিচাপে অভিহিত কৰা হৈছে৷ আন্দোলনকাৰীসকলে বাধ্যতামূলক ক’ভিড ভেকচিন গ্ৰহণ আৰু আন স্বাস্থ্যজনিত নিষেধাজ্ঞা প্ৰত্যাহাৰৰ দাবী কৰিছে৷ প্ৰতিবাদে তীব্ৰ ৰূপ ধাৰণ কৰাৰ পাছত এতিয়া ৰাজধানী অট’ৱাত জাৰি হৈছে হাই-এলাৰ্ট৷ ইপিনে, ক’ভিড নিষেধাজ্ঞাক ট্ৰাকচালকসকলে ‘ফেচিবাদ’ৰ সৈতে তুলনা কৰি কানাডাৰ পতাকাৰ সৈতে নাজী বাহিনীৰ প্ৰতীকো প্ৰদৰ্শন কৰে৷ উল্লেখযোগ্য যে, প্ৰধানমন্ত্ৰী ট্ৰুডোৱে ট্ৰাকচালকসকল বিজ্ঞানবিৰোধী, গুৰুত্বহীন সংখ্যালঘু লোক বুলি মন্তব্য কৰাৰ পাছতেই এই ভয়ংকৰ পৰিস্থিতিৰ সৃষ্টি হয়৷