প্ৰসংগঃ গোৱা চিলিণ্ডাৰ বিস্ফোৰণ ; ক্লাবৰ মালিকক গ্ৰেপ্তাৰ, এতিয়ালৈকে ২৫ জন লোকৰ মৃত্যু

ডিজিটেল ডেস্কঃ গোৱাৰ অৰপোৰাৰ এটা নাইট ক্লাবত সংঘটিত হোৱা মৰ্মান্তিক অগ্নিকাণ্ডত এই পৰ্যন্ত ২৫ জন লোকৰ মৃত্যু হোৱাৰ লগতে ৬ জন লোক আহত হৈছে। 

আহতসকল বৰ্তমান চিকিৎসাধীন হৈ আছে আৰু বৰ্তমান তেওঁলোকৰ অৱস্থা সুস্থিৰ। এই ঘটনাৰ পিছতে সমগ্ৰ অঞ্চলটোত শোক আৰু ক্ষোভৰ সৃষ্টি হৈছে।

এই ঘটনাৰ পিছতে মুখ্যমন্ত্ৰী প্ৰমোদ সাৱন্তই ছ’চিয়েল মিডিয়া প্লেটফৰ্ম এক্সত প্ৰতিক্ৰিয়া প্ৰকাশ কৰে।তেওঁ লিখিছে, "আৰ্পোৰাত সংঘটিত অগ্নিকাণ্ডৰ পৰিস্থিতি মই তীক্ষ্ণ দৃষ্টিৰে নিৰীক্ষণ কৰি আছো, য'ত ২৫ জন লোকৰ প্ৰাণহানি আৰু আহত ৬ জন। আহত আটাইকেইজন সুস্থিৰ আৰু সম্ভৱপৰ উত্তম চিকিৎসা প্ৰদান কৰা হৈছে। সমগ্ৰ ঘটনাটোৰ কাৰণ আৰু দায়ীসকলক চিনাক্ত কৰিবলৈ দণ্ডাধীশৰ তদন্তৰ নিৰ্দেশ দিয়া হৈছে।" মুখ্যমন্ত্ৰীয়ে কয় যে ৰাজ্য চৰকাৰে ভুক্তভোগীৰ পৰিয়ালৰ সৈতে থিয় দিছে আৰু দোষীৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।

অগ্নিকাণ্ডত ২৫ জন লোকৰ মৃত্যু 

গোৱা আৰক্ষীৰ তথ্য অনুসৰি নিহতসকলৰ ভিতৰত আছে ৪ গৰাকী পৰ্যটক আৰু ১৪ গৰাকী ক্লাবৰ কৰ্মচাৰী। আন ৭ জনৰ চিনাক্তকৰণ এতিয়াও হোৱা নাই। ঘটনাৰ কাৰণ এতিয়াও স্পষ্ট হোৱা নাই। আৰক্ষী আৰু অগ্নিনিৰ্বাপক বাহিনীয়ে বিষয়টোৰ তদন্ত কৰি প্ৰাথমিক প্ৰতিবেদন প্ৰস্তুত কৰি থকা হৈছে।

প্ৰধানমন্ত্ৰী নৰেন্দ্ৰ মোদীয়ে মুখ্যমন্ত্ৰী প্ৰমোদ সাৱন্তক ফোন কৰি দুৰ্ঘটনাটোৰ সম্পূৰ্ণ তথ্য লাভ কৰাৰ লগতে আহতসকলৰ অৱস্থাৰ বিষয়ে সোধা-পোছা কৰে। ইয়াৰ পিছতে প্ৰধানমন্ত্ৰীৰ ৰাষ্ট্ৰীয় সাহায্য পুঁজিৰ পৰা ক্ষতিপূৰণ ঘোষণা কৰা হয়। 

এই ঘটনাই নৈশজীৱন আৰু পৰ্যটনস্থলীৰ নিৰাপত্তা আৰু অগ্নি নিৰাপত্তাক লৈ গুৰুতৰ প্ৰশ্নৰ উত্থাপন কৰিছে। তদন্ত সম্পূৰ্ণ নোহোৱালৈকে ক্লাবটো ছীল কৰা হৈছে।