ডিজিটেল ডেস্কঃ দুৰ্ঘটনাত পতিত হৈ চিকিৎসাধীন হৈ থকা ক্ৰিকেটাৰ ঋষভ পন্তৰ সোঁ ভৰিত ইতিমধ্যে দুটা অস্ত্ৰোপচাৰ কৰা হৈছে। চিকিৎসকসকলে কৈছে যে তেওঁৰ আন এটা অস্ত্ৰোপচাৰ কৰা হ'ব। এনে পৰিস্থিতিত পন্তে কেতিয়া খেলপথাৰত অৱতীৰ্ণ হ'ব পাৰিব সেয়া সন্দেহৰ বিষয় হৈ পৰিছে।
হয়তো ঋষভ পন্তে এই বছৰ খেলপথাৰৰ বাহিৰতে কটাব লাগিব পাৰে। চিকিৎসকসকলে তেনে ধাৰণাই কৰিছে। তেওঁ ইতিমধ্যে দুটা অস্ত্ৰোপচাৰ কৰাইছে। পন্তৰ আঘাত সম্পূৰ্ণৰূপে নিৰাময় হোৱা নাই। ক্ৰীড়া ৱেবছাইট 'ক্ৰিকইনফো'ৰ মতে, পন্তৰ শীঘ্ৰে আন এটা অস্ত্ৰোপচাৰ কৰা হ'ব। গতিকে ভাৰতীয় ক্ৰিকেটাৰজনে খেলপথাৰত নামিবলৈ দীঘলীয়া সময় অপেক্ষা কৰিব লাগিব।
পণ্টৰ প্ৰথমে সোঁ ভৰিৰ আঁঠুত আৰু তাৰ পিছত সোঁ ভৰিৰ গোৰোহাৰ লিগামেণ্টত অস্ত্ৰোপচাৰ কৰা হৈছিল। ভাৰতীয় ক্ৰিকেট নিয়ন্ত্ৰণ ব'ৰ্ডৰ (বিচিচিআই) এজন ক্ৰীড়া অৰ্থোপেডিক চাৰ্জন দিনেশ পাৰ্ডিৱালাৰ নেতৃত্বত পন্তৰ মুম্বাইত অস্ত্ৰোপচাৰ কৰা হৈছিল। যুৱ ক্ৰিকেটাৰজন এতিয়া কোকিলাবেন ধীৰুভাই আম্বানী চিকিৎসালয়ৰ ক্ৰীড়া বিজ্ঞান আৰু সুস্থতা বিভাগৰ মুৰব্বী বৈভৱ দাগৰ অধীনত চিকিৎসাধীন হৈ আছে।
এই তিনিটা অস্ত্ৰোপচাৰৰ কৰাৰ ফলত পন্তে পৰৱৰ্তী আঠৰ পৰা ন মাহৰ বাবে খেলপথাৰৰ বাহিৰত থাকিব লাগিব। ফলস্বৰূপে, ছেপ্টেম্বৰত এছিয়া কাপলৈকে তেওঁ খেলিব পৰাৰ সম্ভাৱনা নাই। ভাৰতীয় ক্ৰিকেটাৰজনে অক্টোবৰ-নৱেম্বৰত এদিনীয়া বিশ্বকাপ খেলিব পাৰিবনে নাই সেয়াও অনিশ্চিত। কিয়নো তেওঁ সুস্থ হৈ উঠিলেও পৰিস্থিতিৰ সৈতে নিজকে মিলাই ল’বলৈ অধিক সময়ৰ প্ৰয়োজন হ'ব। গতিকে চিকিৎসকসকলে আশংকা কৰিছে যে এই বছৰ তেওঁৰ খেলাৰ সম্ভাৱনা তেনেই ক্ষীণ।
Continue Reading
