ডিজিটেল ডেস্কঃ ৩৬ বছৰৰ পাছত পুনৰ বিশ্বজয় কৰিব বিচাৰে আৰ্জেণ্টিনাই। বিশ্বকাপৰ ফাইনেলত উপনীত হোৱাৰ পাছতে এতিয়া আৰ্জেণ্টিনাৰ লোকসকলৰ মনত আনন্দৰ সীমা নাই। কাটাৰলৈ আহিছে লাখ লাখ আৰ্জেণ্টাইন লোক। কিন্তু যিসকলে বিশ্বকাপ চাবলৈ আহিব পৰা নাই, তেওঁলোকেও নিজৰ ব্যৱস্থা কৰি লৈছে। ডিয়েগ’ মাৰাডোনাৰ ঘৰত বহি বিশ্বকাপৰ ফাইনেল উপভোগ কৰিব তেওঁলোকে।
দেশখনৰ ৰাজধানী বুয়েনছ আইৰছত মাৰাডোনাৰ এটা ঘৰ আছে। ১৯৮০ চনত ঘৰটো মাক-দেউতাকৰ বাবে ক্ৰয় কৰিছিল মাৰাডোনাই। ১৯৮৬ চনৰ বিশ্বকাপ বিজয়ৰ পাছত তেওঁ এই ঘৰটোতে অনুৰাগীসকলৰ অভিবাদন গ্ৰহণ কৰিছিল।
ঘৰটো এতিয়া ক্ৰয় কৰিছে আৰিয়েল ফেৰ্ণাণ্ডো গাৰ্চিয়া নামৰ এজন চুবুৰীয়াই। প্ৰায় ৭ কোটি টকাত ঘৰটো ক্ৰয় কৰিছে গাৰ্চিয়াই। লগে লগে তেওঁ ঘৰটো স্থানীয় লোকসকলৰ বাবে তেওঁ মুকলি কৰি দিছে। ঘৰৰ চৌহদত ডাঙৰ পৰ্দা ৰখা হৈছে। তাত আৰ্জেণ্টিনাৰ মেচসমূহ প্ৰদৰ্শন কৰা হৈছে। সকলোৱে আৰ্জেণ্টিনাৰ বাবে চিঞৰিছে।
ক্ৰ’ৱেছিয়াৰ বিৰুদ্ধে খেলা চেমিফাইনেলত ঘৰটোত ৭০০ জন মানুহ গোট খাইছিল। খেল চোৱাৰ সমান্তৰালভাৱে ভোজৰো আয়োজন কৰা হৈছে। ৰন্ধা হৈছে গৰুৰ মাংস, গাহৰিৰ মাংস আৰু অনেক সুস্বাদু ব্যঞ্জন। কিন্তু মদ্যপানৰ ব্যৱস্থা কৰা হোৱা নাই।
স্থানীয় লোকসকলে মাৰাডোনাই বাস কৰা ঘৰটোলৈ আহি শিহৰিত হৈ পৰিছে। তেওঁলোকে ঘৰটোৰ সকলোবোৰ কোঠালি তন্ন তন্নকৈ চাই মহান ফুটবলাৰগৰাকীক সোঁৱৰণ কৰিছে। মাৰাডোনাৰ ঘৰটো মন্দিৰসদৃশ হৈ পৰিছে।
এতিয়া সকলোৱে ৰৈ আছে দেওবাৰৰ দিনটোলৈ। আৰ্জেণ্টিনা বনাম ফ্ৰান্স চাবলৈ অসংখ্য ফুটবলপ্ৰেমী উবুৰি খাই পৰিব মাৰাডোনাৰ ঘৰত।
Continue Reading
