ডিজিটেল ডেস্কঃ ২৫ বছৰতকৈ অধিক সময় গুজৰাটত শাসন কৰা ভাৰতীয় জনতা পাৰ্টিয়ে ২০২২ চনৰ ৰাজ্য বিধানসভা নিৰ্বাচনত ২০৯ কোটিৰো অধিক ধন ব্যয় কৰিছিল। নিৰ্বাচন আয়োগক দাখিল কৰা প্ৰতিবেদনত এই তথ্য দলটোৱে দিছে। বৃহস্পতিবাৰে এই ব্যয়ৰ প্ৰতিবেদন ৰাজহুৱা কৰে নিৰ্বাচনী সংস্থাটোৱে।
যোৱা ১৫ জুলাইত দলটোৱে দাখিল কৰা গুজৰাট নিৰ্বাচনৰ মূল নিৰ্বাচনী ব্যয়ৰ প্ৰতিবেদন অনুসৰি সাধাৰণ দলৰ প্ৰচাৰ আৰু প্ৰাৰ্থীৰ পুঁজিৰ বাবে ২০৯.৯৭ কোটি টকা ব্যয় কৰিছিল। বিগত ডিচেম্বৰ মাহত গুজৰাটত বিজয়ৰ সৈতে পুনৰ ক্ষমতালৈ আহিছিল বিজেপি।
দলটোৱে প্ৰতিদ্বন্দ্বিতা কৰা প্ৰাৰ্থীসকলক প্ৰায় ৪১ কোটি টকা আদায় দিয়াৰ লগতে বিমান, হেলিকপ্টাৰ ব্যৱহাৰকে ধৰি ভ্ৰমণ ব্যয়ৰ বাবে ১৫ কোটিৰো অধিক ধন ব্যয় কৰে। সাধাৰণ প্ৰচাৰৰ বাবে দলটোৱে ব্যয় কৰিছিল ১৬০.৬২ কোটি টকা।
গুজৰাট বিধানসভা নিৰ্বাচনত বিজেপিয়ে ১৫৬খন আসন লাভ কৰি ঐতিহাসিক জয় পঞ্জীয়ন কৰাৰ লগতে বিপুল ব্যৱধানেৰে উল্লেখযোগ্য সংখ্যক আসন লাভ কৰি এই অভিলেখ ভংগ কৰে। গুজৰাটৰ সংৰক্ষণ আন্দোলনৰ পটভূমিত ২০১৭ চনৰ বিধানসভা নিৰ্বাচনত পাটিদাৰ সম্প্ৰদায়ৰ এটা অংশই বিজেপিৰ বিৰুদ্ধে ভোটদান কৰিছিল।
গুজৰাটত ১৫৬খন আসনৰ অভিলেখ সৃষ্টি হৈছে। কেৱল বিজেপিয়েই নহয় ৰাজ্য বিধানসভাৰ নিৰ্বাচনত ইমান আসন আন কোনো দলেই লাভ কৰিব পৰা নাই। ইয়াৰ পূৰ্বে কেৱল কংগ্ৰেছেহে ১৪৯খন আসন লাভ কৰিছিল, যিটো অভিলেখ আছিল।
ইয়াৰ পূৰ্বে ২০০২ চনত বিজেপিৰ সৰ্বোত্তম প্ৰদৰ্শন দেখা গৈছিল, য’ত দলটোৱে ১৮২খন আসনৰ ভিতৰত ১২৭খন আসন লাভ কৰিছিল। কিন্তু তাৰ পাছৰ পৰা দলটোৱে ধাৰাবাহিকভাৱে ক্ষমতাত আছে যদিও ২০০৭ চনত ১১৫খন, ২০১২ চনত ১১৫খন আৰু ২০১৭ চনত ৯৯খন আসন লাভ কৰিছিল।
Continue Reading
