ডিজিটেল ডেস্কঃ মুকেশ আম্বানীক চেৰ পেলাই এছিয়াৰ আটাইতকৈ ধনী ব্যক্তিত পৰিণত হোৱা গৌতম আদানিয়ে গুজৰাটত যথেষ্ট বিনিয়োগ কৰাৰ প্ৰতিশ্ৰুতি দিছে। বুধবাৰে গান্ধীনগৰত ভাইব্ৰেণ্ট গুজৰাট সন্মিলন ২০২৪ ত অংশগ্ৰহণ কৰি আদানীয়ে ঘোষণা কৰে যে তেওঁৰ কোম্পানীয়ে অহা পাঁচ বছৰত গুজৰাটত ২ লাখ কোটি টকা বিনিয়োগ কৰিব বুলি প্ৰতিশ্ৰুতি দিয়ে।
এনে বিনিয়োগৰ ফলস্বৰূপে বহু চাকৰিৰ সৃষ্টি হ'ব। আদানিয়ে দাবী কৰিছে যে ১ লাখ চাকৰিৰ সুযোগ সৃষ্টি হ’ব। মোদীক প্ৰশংসা কৰি আদানিয়ে কয় "আপোনাৰ নেতৃত্বত ২০৪৭ চনৰ ভিতৰত ভাৰত এখন উন্নত দেশ হৈ পৰিব। আপুনি ভাৰতক এখন শক্তিশালী দেশ হিচাপে গঢ়ি তুলিব পাৰিছে। "
উল্লেখ্য কিছুদিন পূৰ্বে হিণ্ডেনবাৰ্গ গোচৰত উচ্চতম ন্যায়ালয়ে আদানিক সকাহ দিছিল। উচ্চতম ন্যায়ালয়ে কৈছিল যে হিণ্ডেনবাৰ্গ গোচৰত এছআইটি তদন্তৰ কোনো প্ৰয়োজন নাই। গোচৰটোত ছেবিৰ তদন্তৰ ওপৰতে নিৰ্ভৰ কৰিবলৈ নিৰ্দেশ দিয়া হৈছিল।
তাৰ পিছতে আদানিৰ শ্বেয়াৰে গতি লাভ কৰে। ব্লুমবাৰ্গ বিলিয়নেয়াৰ ইণ্ডেক্স অনুসৰি আদানি এতিয়া এছিয়াৰ আটাইতকৈ ধনী ব্যক্তি। এনে স্বীকৃতিৰ পিছতে আদানি কৈছিল, "সত্যৰ সদায় জয় । যিসকলে আমাৰ কাষত থিয় দিছিল তেওঁলোকৰ প্ৰতি আমি কৃতজ্ঞ। এনেদৰেই আমি ভাৰতৰ উন্নয়নৰ বাবে কাম কৰি যাম। "
Continue Reading
