গুটখা খাওক, মদ খাওক অথবা গাঞ্জা সেৱন কৰক, কিন্তু পানী বচাওক! কোন বিজেপি সাংসদে ক’লে এইদৰে?

ডিজিটেল ডেস্কঃ গুটখা খাওক, মদ খাওক অথবা গাঞ্জাসেৱন কৰক, প্ৰয়োজন হ’লে আঠাও শুঙক, কিন্তু পানী বচোৱা! এগৰাকী বিজেপি সাংসদে পানী সংৰক্ষণৰ আজৱ উপায় দিলে এইদৰে।

মধ্যপ্ৰদেশৰ ৰেৱাত অনুষ্ঠিত পানী সংৰক্ষণ সংক্ৰান্তীয় এটা কৰ্মশালাত উপস্থিতি আছিল বিজেপি সাংসদ জনাৰ্দন মিশ্র। নিজৰ ভাষণত তেওঁ কয় যে মাটিৰ পৰা পানী শুকাই গৈছে আৰু এইবিষয়ে সকলোৱে সচেতন হোৱা প্ৰয়োজন।

নিজৰ ভাষণত পানী সংৰক্ষণৰ বিষয়ে ক’বলৈ গৈ তেওঁ কয় যে প্ৰয়োজন হ’লে গুটখা, মদ, গাঞ্জা সেৱন কৰক, কিন্তু দয়া কৰি সকলোৱে যাতে পানীৰ গুৰুত্ব বুজিবলৈ চেষ্টা কৰে!

সাংসদগৰাকীৰ এই আজৱ উপায় শেহতীয়াকৈ সামাজিক মাধ্যমত যথেষ্ট চৰ্চাৰ কেন্দ্ৰবিন্দু হৈ পৰিছে। যিখন মঞ্চত তেওঁ ভাষণ প্ৰদান কৰিছিল, তাৰ পাছফালেই প্ৰধানমন্ত্ৰী নৰেন্দ্ৰ মোদীৰো  এখন পোষ্টাৰ আঁৰি থোৱা আছিল।

উল্লেখ্য যে মধ্যপ্ৰদেশত পানী সংৰক্ষণক লৈ বিজেপি চৰকাৰে বিভিন্ন পদক্ষেপ হাতত লৈ আহিছে। এতিয়া সাংসদগৰাকীৰ পানী সংৰক্ষণক লৈ কৰা এই বক্তব্যই অশেষ আমোদ যোগান ধৰিছে।