ডিজিটেল ডেস্কঃ আপোনাৰ বাৰু হাফপেণ্ট বিতৰ্কলৈ মনত পৰেনে? কিছুদিনৰ পূৰ্বে যে হাফপেণ্টে সমাজত জোকৰণিৰ সৃষ্টি কৰিছিল সেই কথা আপুনি নিশ্চয় পাহৰা নাই। বিএছচি এগ্ৰিকালচাৰৰ প্ৰৱেশ পৰীক্ষাত হাফপেণ্ট আৰু টি চাৰ্ট পিন্ধি অহাৰ বাবে এগৰাকী পৰীক্ষাৰ্থীক পৰীক্ষাত বহাৰ অনুমতি দিয়া নাছিল অসম কৃষি বিশ্ববিদ্যালয়ৰ পৰীক্ষা পৰ্যবেক্ষকে। অৱশেষত ছাত্ৰীগৰাকীক এখন পৰ্দা গাত মেৰিয়াই লৈ পৰীক্ষাত বহাৰ অনুমতি দিয়া হৈছিল।
এইবাৰ হাফপেণ্ট আকৌ বিতৰ্কৰ মাজত সোমাই পৰিছে। এইবাৰ যেনিবা ঘটনাৰ স্থান অসম নহয়। পশ্চিমবংগৰ কলিকতাত এইবাৰ সংঘটিত হৈছে হাফপেণ্ট কাণ্ড আৰু এইবাৰ যুৱতী নহয় যুৱকহে সাঙুৰ খাই পৰিছে। আশীষ নামৰ এজন যুৱকৰ সৈতে ঘটিছে এই কাণ্ড। আশীষে টুইটাৰত নিজৰ ক্ষোভ উজৰাৰ পাছতেই বিষয়টো সকলোৰে দৃষ্টিগোচৰ হয়। যুৱকজনে টুইটাৰত লিখা অনুসৰি তেওঁ কলকাতাৰ ষ্টেটবেংকৰ এটা শাখালৈ হাফপেণ্ট পিন্ধি গৈছিল। কিন্তু বেংকটোৰ ভিতৰত তেওঁক সোমোৱাত বাধা প্ৰদান কৰে নিৰাপত্তাৰক্ষীয়ে। যুৱকজনে ইয়াৰ কাৰণ জানিবলৈ বিচৰাত নিৰাপত্তাৰক্ষীয়ে কয় যে বেংকৰ ভিতৰত হাফপেণ্ট পিন্ধি প্ৰৱেশ কৰাৰ অনুমতি কাকো দিয়া হোৱা নাই। তেওঁক লংপেণ্ট পিন্ধি আহিবলৈ কয় নিৰাপত্তাৰক্ষীয়ে।
আৰু পঢ়কঃ হত্যাৰ চেষ্টা চলোৱাৰ অভিযোগত গ্ৰেপ্তাৰ তৃণমূল যুৱ কংগ্ৰেছৰ নেত্ৰী সায়োনী ঘোষ
খঙতে বেংক ত্যাগ কৰি যুৱকজনে মনৰ ক্ষোভ টুইটাৰত প্ৰকাশ কৰে। আশিসে টুইটাৰত কৰা এনে অভিযোগ সন্দৰ্ভত অৱশ্যে এতিয়ালৈকে কোনো প্ৰতিক্ৰিয়া ব্যক্ত কৰা নাই কলিকতাৰ ষ্টেট বেংক কৰ্তৃপক্ষই। আশিসৰ টুইটক একাংশই সমৰ্থন আগবঢ়াইছে আৰু আন একাংশই বেংক কৰ্তৃপক্ষৰ পদক্ষেপৰ শলাগ লৈছে।
