হাইলকান্দিত ফুটবল উদ্ধাৰ কৰিবলৈ গৈ দুটা কিশোৰৰ সলিল সমাধি

হাইলকান্দি জিলাৰ চিপৰচংগন গাঁও পাৰ্ট-১ ত বৃহস্পতিবাৰে সন্ধিয়া এক হৃদয় বিদাৰক ঘটনা সংঘটিত হয়। ফুটবল খেলৰ সময়ত নলাত পৰা বল উদ্ধাৰ কৰিবলৈ গৈ দুটা কিশোৰে কৰুণ মৃত্যুক সাৱটি লয়। এই দুখবৰ বিয়পি পৰাৰ লগে লগে সমগ্ৰ অঞ্চলটোত শোকৰ ছাঁ পৰিছে।

স্থানীয় সূত্ৰৰ পৰা জানিব পৰা মতে, মৃত কিশোৰ দুজন ক্ৰমে ১৩ বছৰীয়া অভিনৱ সিনহা আৰু ১৫ বছৰীয়া অৰূপম সিনহা। ঘটনাটো হাইলকান্দি চহৰৰ পৰা প্ৰায় ২০ কিলোমিটাৰ দূৰত্বত অৱস্থিত গাঁওখনৰ ওচৰৰ এখন পথাৰত সংঘটিত হৈছিল। কিশোৰ কেইজনে তেওঁলোকৰ বন্ধুসকলৰ সৈতে ফুটবল খেলি আছিল।

খেল চলি থকাৰ সময়তে দুৰ্ভাগ্যবশতঃ ফুটবলটো ওচৰৰ এটা নলাত পৰি যায়। বলটো পুনৰ ঘূৰাই আনিবলৈ অভিনৱ আৰু অৰূপম দুয়োজনে নলাত নামিছিল। কিন্তু নলাৰ গভীৰ অংশত সোমাই পৰাত তেওঁলোক দুয়োজনেই পানীত ডুব যায়।

কিশোৰ দুজনক বিপদত পৰা দেখি স্থানীয় লোক আৰু পৰিয়ালৰ সদস্যসকলে ততাতৈয়াকৈ ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। বহু চেষ্টাৰ পিছতো তেওঁলোকক বচাব পৰা নগ'ল। এই ঘটনাত অভিনৱ সিনহাৰ পিতৃ সুকান্ত সিনহা সহ পৰিয়ালৰ সদস্যসকল শোকত ভাগি পৰিছে। এই আকস্মিক মৃত্যুৱে গাঁওখনত গভীৰ শোকৰ সৃষ্টি কৰিছে।