ডিজিটেল ডেস্কঃ আজি হাৰিয়ানা সীমান্তত আন এজন আন্দোলনকাৰী কৃষকৰ মৃত্যু। বৃহস্পতিবাৰে নিশা হাৰিয়ানাৰ খানাউৰী সীমান্তত অসুস্থ হৈ পৰে কৃষকজন। পাছত কৃষকজনৰ মৃত্যু হয়। আঠ লাখ টকাৰ ঋণৰ বোজা মূৰত লৈ আন্দোলনত কৃষকজনে যোগদান কৰিছিল।
মৃত কৃষকজনৰ নাম দৰ্শন সিং (৬২)। মৃত সিং পঞ্জাবৰ ভাটিন্দাৰ অমৰগড় গাঁৱৰ বাসিন্দা। ১৩ ফেব্ৰুৱাৰীৰ পৰা সীমান্তত বহি আছিল দৰ্শন সিং। সিঙে আন কৃষকৰ লগতে ‘দিল্লী চলো’ আন্দোলনত যোগদান কৰে। বৃহস্পতিবাৰে মাজনিশা কিছু সময়ৰ পূৰ্বে প্ৰতিবাদস্থলীত তেওঁ অসুস্থ হৈ পৰে। কৃষকজনী সংজ্ঞাও হেৰুৱাই পেলায়। ততাতৈয়াকৈ তেওঁক স্থানীয় চিকিৎসালয়লৈ প্ৰেৰণ কৰা হয়। তাৰ পৰাই তেওঁক আন এখন চিকিৎসালয়লৈ বদলি কৰিবলৈ কোৱা হয়। সেইবাবে কৃষকজনক পাটিয়ালাৰ ৰাজেন্দ্ৰ চিকিৎসালয়লৈ লৈ যোৱা হয়।য’ত কৃষকজনৰ মৃত্যু হয়।
এই কৃষকজনৰ অমৰগড় গাঁৱৰ আঠ বিঘা মাটি আছিল। অৱশ্যে তেওঁৰ কমেও আঠ লাখ টকাৰ ঋণ আছিল। আন্দোলনকাৰী কৃষক সংগঠনসমূহে দৰ্শন সিঙৰ মৃত্যুত শোক প্ৰকাশ কৰিছে। একে সময়তে কেন্দ্ৰীয় চৰকাৰৰ বিৰুদ্ধেও ক্ষোভৰ সৃষ্টি হৈছে। কৃষকসকলে দাবী কৰে যে সীমান্তত আৰু বহু এনে কৃষকৰ মৃত্যু হ’ব পাৰে। মৃত্যুৰ পৰা হাত সাৰিবলৈ চৰকাৰে তেওঁলোকৰ দাবী মানি লোৱা উচিত।
শেহতীয়া কৃষক আন্দোলনত বুধবাৰে দেশত প্ৰথমটো মৃত্যু হয়। ২১ বছৰীয়া শুভকৰণ সিঙৰ খানাউৰী সীমান্তত মৃত্যু হয়। আৰক্ষীৰ সৈতে হোৱা কাজিয়াৰ সময়ত কৃষকজন মূৰত আঘাতপ্ৰাপ্ত হয়। চিকিৎসালয়লৈ নিয়াৰ সময়ত চিকিৎসকে তেওঁক মৃত বুলি ঘোষণা কৰে।
হাৰিয়ানাৰ পঞ্জাবৰ কেইবাটাও কৃষক সংগঠনে যোৱা ১৩ ফেব্ৰুৱাৰীৰ পৰা ‘দিল্লী চলো’আন্দোলনৰ আহ্বান জনাইছে। কৃষকসকলে দিল্লীত প্ৰৱেশৰ পূৰ্বে সীমান্তত আৰক্ষীৰ সৈতে প্ৰতিদিনে সংঘৰ্ষৰ সৃষ্টি হয়। আন্দোলনকাৰী কৃষকৰ প্ৰতিনিধিয়ে ইতিমধ্যে কেইবাবাৰো চৰকাৰৰ সৈতে বৈঠকত মিলিত হৈছে।
Continue Reading
