হাৰিয়ানাত গেৰুৱা চৰকাৰৰ পতন হ'ব নেকি? কি ক’লে প্ৰাক্তন মুখ্যমন্ত্ৰী মনোহৰলাল খট্টৰে?

 নিৰ্দলীয় বিধায়ক সোমবীৰ চাংৱান, ৰণধীৰ গোলেন আৰু ধৰমপাল গোণ্ডেয়ে মঙলবাৰে শিবিৰ সলনি কৰে। হাৰিয়ানাৰ প্ৰাক্তন মুখ্যমন্ত্ৰী ভূপিন্দৰ সিং হুডা আৰু প্ৰদেশ কংগ্ৰেছৰ মুৰব্বী উদয় ভানৰ উপস্থিতিত তিনিওজন বিধায়কে এখন সংবাদমেলত কংগ্ৰেছক সমৰ্থন জনোৱাৰ কথা ঘোষণা কৰে। ইয়াৰ পিছত কংগ্ৰেছে হাৰিয়ানাত ৰাষ্ট্ৰপতি শাসনৰ দাবী উত্থাপন কৰে। খট্টৰে অৱশ্যে কয়, " বিৰোধীৰ  কেইবাজনো বিধায়কে আমাৰ সৈতে যোগাযোগ কৰি আছে। বহু নেতা আমাৰ সমৰ্থনত ওলাই আহিছে। কেইদিনমানৰ পিছত এয়া  প্ৰকাশ কৰা হ'ব যে কিমান জন নেতা আমাৰ সৈতে সম্পৰ্কত আছে।’’ জ্যেষ্ঠ বিজেপি নেতাজনে লগতে দাবী কৰে  যে গেৰুৱা দলটোৱে আগন্তুক নিৰ্বাচনত হাৰিয়ানাৰ ১০ খন আসনৰ সকলোবোৰতে জিকিব। কংগ্ৰেছে অৱশ্যে দাবী কৰিছে যে বিজেপিয়ে বিধানসভাত ইয়াৰ "সংখ্যগৰিষ্ঠতা" হেৰুৱাইছে। সেয়ে ৰাজ্যখনত ৰাষ্ট্ৰপতি শাসন তৎক্ষণাৎ জাৰি কৰিব লাগে।

 বিজেপিয়ে ইতিমধ্যে জেজেপিৰ সমৰ্থন হেৰুৱাইছে। এইবাৰ, নিৰ্দলীয় তিনি ধিধায়কেও  সমৰ্থন প্ৰত্যাহাৰ কৰিছে। ফলস্বৰূপে, ৯০ খন আসন থকা হাৰিয়ানা বিধানসভাত বিজেপিৰ শিবিৰ কঁপি উঠিছে। ৰাজ্য খনত বিজেপিৰ  ৪০ জন বিধায়ক আছে। কংগ্ৰেছ নেতাসকলে মুখ্যমন্ত্ৰী নৱাব সিং চাইনীৰ পদত্যাগ দাবী কৰিছে। হাৰিয়ানাৰ বিধানসভা নিৰ্বাচন এই বছৰৰ অক্টোবৰ মাহত অনুষ্ঠিত হ'ব। তাৰ আগতে চৰকাৰ ভংগ হোৱাৰ আশংকাই দেখা দিছে৷  হাৰিয়ানাত চৰকাৰ গঠন কৰিবলৈ এটা ৰাজনৈতিক দলক ৪৬ জন বিধায়কৰ সমৰ্থনৰ প্ৰয়োজন। এতিয়া, বিধানসভাত বৰ্তমানৰ দলৰ স্থিতিয়ে দেখুৱাইছে যে বিজেপিৰ ৪০ জন বিধায়ক আছে। হাৰিয়ানাত বিজেপিৰ হাৰিয়ানা লোকহিত পাৰ্টিৰ (এইচএলপি) বিধায়কৰ  লগতে  কমেও তিনিজন নিৰ্দলীয় বিধায়কৰ সমৰ্থন আছে।এতিয়া  মুঠতে, শাসকীয় বিজেপিৰ ৪৪  জন বিধায়কৰ সমৰ্থন আছে –চৰকাৰ গঠন কৰিব পৰাকৈ প্ৰয়োজনীয় সীমাতকৈ এতিয়া বিজেপিৰ দুখন আসন কম হৈ আছে।  এজন কম বিধায়ক থাকিলেও, বিজেপিয়ে ৰাজ্যখনত চৰকাৰ ৰক্ষা  কৰিব নোৱাৰিব। হাৰিয়ানা বিধানসভাত কংগ্ৰেছৰ ৩০ জন বিধায়ক আছে। তিনিজন বিধায়কৰ সমৰ্থনত, ইয়াৰ সংখ্যা ৩৩  হৈ আছে।