ডিজিটেল ডেস্ক: ঝাৰখণ্ডৰ তিনিগৰাকী কংগ্ৰেছ বিধায়কক বৃহৎ পৰিমাণৰ ধনৰাশিৰ সৈতে পশ্চিম বংগত আটক কৰা হৈছিল৷ পৰৱৰ্তী সময়ত হাওৰাত এই তিনি কংগ্ৰেছ বিধায়কক গ্ৰেপ্তাৰ কৰা হৈছিল৷ আৰু এতিয়া তৃণমূল কংগ্ৰেছে বংগত কংগ্ৰেছ বিধায়কসকলৰ গ্ৰেপ্তাৰ সন্দৰ্ভত ইডিৰ নীৰৱতাক লৈ উত্থাপন কৰিছে প্ৰশ্ন৷
তৃণমূল কংগ্ৰেছে কালি ঝাৰখণ্ডৰ তিনিগৰাকী কংগ্ৰেছ বিধায়কৰ বাহনৰ পৰা বৃহৎ পৰিমাণৰ হিচাপবিহীন নগদ ধন উদ্ধাৰৰ ক্ষেত্ৰত প্ৰৱৰ্তন সঞ্চালকালয়ৰ নীৰৱতাত আশ্চৰ্য প্ৰকাশ কৰিছে৷
তৃণমূল কংগ্ৰেছে লগতে দাবী কৰে যে ধন জব্দ সম্পৰ্কত পশ্চিম বংগ বিধানসভাৰ বিৰোধী দলৰ নেতা সুভেন্দু অধিকাৰীৰ ভূমিকাক লক্ষ্য ৰখাটো প্ৰয়োজন, কিয়নো তেওঁ শেহতীয়াকৈ মন্তব্য কৰিছিল যে মহাৰাষ্ট্ৰৰ পিছত, ই হ’ব ঝাৰখণ্ড, ৰাজস্থান আৰু পশ্চিম বংগ।
এক গোপন সূত্ৰৰ জৰিয়তে পশ্চিম বংগ আৰক্ষীয়ে শনিবাৰে সন্ধিয়া হাওৰাত এখন এছইউভি আটক কৰে য’ত ঝাৰখণ্ডৰ কংগ্ৰেছ বিধায়কসকলে যাত্ৰা কৰি আছিল আৰু তাত প্ৰায় আধা কোটি টকা পোৱা বুলি অভিযোগ কৰা হৈছে। সোধা-পোছাৰ পিছত, দেওবাৰে আবেলি তেওঁলোকক আনুষ্ঠানিকভাৱে গ্ৰেপ্তাৰ কৰা হৈছিল।
টিএমচিয়ে এই বিবৃতি এই কাৰণেই জাৰি কৰিছে, কিয়নো বৰ্তমান নিলম্বিত জ্যেষ্ঠ টিএমচি নেতা পাৰ্থ চেটাৰ্জীৰে সম্পৰ্কিত এগৰাকী মহিলাৰ দুটা ফ্লেটৰ পৰা ইডিয়ে বৃহৎ পৰিমাণৰ ধন জব্দ কৰিছিল৷ বিদ্যালয়ৰ চাকৰি কেলেংকাৰিৰ সন্দৰ্ভত কেন্দ্ৰীয় সংস্থাই দুয়োকে গ্ৰেপ্তাৰ কৰিছিল।
কংগ্ৰেছে দেওবাৰে অভিযোগ কৰে যে বিজেপিয়ে প্ৰতিজন বিধায়কক ১০ কোটি টকা আগবঢ়াই ঝাৰখণ্ডত জেএমএম নেতৃত্বাধীন চৰকাৰখন ভংগ কৰিবলৈ চেষ্টা কৰি আছে।
টিএমচিৰ মুখপাত্ৰ কুনাল ঘোষে কয়, বংগৰ বিজেপি নেতা সুভেন্দু অধিকাৰীয়ে ঝাৰখণ্ডৰ দৰে অ-এন ডি এ শাসিত ৰাজ্যসমূহত চৰকাৰ গঠনৰ কথা কৈছিল। আমি এটা তদন্ত বিচাৰো যে উদ্ধাৰ হোৱা ধনগণতান্ত্ৰিকভাৱে নিৰ্বাচিত ঝাৰখণ্ড চৰকাৰক উৎখাত কৰাৰ ষড়যন্ত্ৰৰ অংশ নেকি?
বিজেপিৰ পশ্চিম বংগ গোটে তৃণমূলৰ অভিযোগবোৰ ভিত্তিহীন বুলি অভিহিত কৰিছে।
বিজেপিৰ ৰাজ্যিক সভাপতি সুকান্ত মজুমদাৰে কয়, বিজেপি কোনো প্ৰকাৰে ইয়াত জড়িত নহয়। আমি ভাবো টিএমচিয়ে বিদ্যালয় নিযুক্তি কেলেংকাৰীৰ জৰিয়তে উপাৰ্জন কৰা অবৈধ নগদ ধন চোৰাংকৈ উলিয়াবলৈ চেষ্টা কৰি আছিল৷
Continue Reading
