'হে মহান সেনা তুমি দেশ ৰক্ষা কৰা আৰু মই তোমাৰ সন্তানৰ দায়িত্ব ল'ম'- মাতৃত্বৰ স্নেহৰে অজান শিশুক আঁকো

ডিজিটেল ডেস্ক: ৰাছিয়া আৰু ইউক্ৰেইনৰ মাজত যুদ্ধৰ যেতিয়া ইতিহাস লিখা হ’ব, কিমানজন লোকে প্ৰাণ হেৰুৱাইছে আৰু কিমান ক্ষতি হৈছে, কোন কাৰ পক্ষত আছিল, এইবোৰ ঘটনাই স্থান পাব। সম্ভৱতঃ মানৱ সভ্যতাৰ ধ্বংসলীলাৰ মাজতে বহুজনৰ চকুত চকুপানী অনা বহুতো ঘটনা-পৰিঘটনা সকলোৰে অজ্ঞাতে নাইকিয়া হ’ব। হয়তো যুদ্ধ শেষ হ’ব, এদিন শান্তিও ঘূৰি আহিব! কিন্তু এনে কিছুমাণ হৃদয়স্পৰ্শী ঘটনাই দি যাব হেৰুওৱাৰ বেদনা৷ শেহতীয়াকৈ, যুদ্ধৰ মাজতে ইউক্ৰেইন সীমান্তত এক আচৰিত ঘটনা পোহৰলৈ আহিছে। য’ত এগৰাকী মহিলাই নিজকে দুটি কণমানিৰ মাতৃ বুলি চিনাকী দিছিল৷ জানিব পৰা মতে, মহিলাগৰাকীয়ে কেইমিনিটমানৰ আগতে লগ পাইছিল এজন ব্যক্তিক৷ যুদ্ধত নিজকে সমৰ্পণ কৰা ব্যক্তিজনৰ পুত্ৰ সন্তান দুটিক আঁকোৱালি ধৰিছিল মহিলাগৰাকীয়ে৷ লগতে যুদ্ধৰ ক’লা ডাৱৰৰ পৰা সুৰক্ষিত স্থানলৈ লৈ গৈছিল সেই কণমানিকেইজনক। এই দেৱীসদৃশ মহিলাগৰাকীৰ নাম আছিল নাটালিয়া আবলিয়েভা৷ [caption id="attachment_134342" align="alignnone" width="300"] মাতৃত্বৰ স্নেহৰে অজান শিশুক আঁকোৱালী ল'লে এগৰাকী মহিলাই[/caption] দৰাচলতে, শনিবাৰে, যেতিয়া নাটালিয়া আবলিয়েভা ইউক্ৰেইনৰ এৰি চুবুৰীয়া দেশলৈ ঢাপলি মেলিছিল, তেতিয়া তেওঁ সীমান্তত এজন ইউক্ৰেইনৰ লোকক লগ পাইছিল। ব্যক্তিজনে তেওঁৰ পুত্ৰ আৰু কন্যাক ঘৰৰ পৰা লৈ গৈছিল দেশ এৰিবলৈ। সীমান্ততহে লাগিছিল লেঠাটো৷ তাত নিয়োজিত সৈন্যই তেওঁক ইউক্ৰেইন পাৰ হ’বলৈ অনুমতি দিয়া নাছিল। কিয়নো চৰকাৰে ইউক্ৰেইনৰ নাগৰিকৰ বাবে বান্ধি দিছিল কিছু নিয়ম৷ নিয়ম অনুসৰি, ১৮ৰ পৰা ৬০ বছৰ বয়সৰ সকলো পুৰুষক দেশ এৰি যোৱাত নিষেধাজ্ঞা আৰোপ কৰিছিল চৰকাৰেখনে, যাতে সকলোৱে মিলি একজোট হ’ব পাৰে ৰাছিয়াৰ বিৰুদ্ধে। [caption id="attachment_134343" align="alignnone" width="300"] মাতৃত্বৰ স্নেহৰে অজান শিশুক আঁকোৱালী ল'লে এগৰাকী মহিলাই[/caption] ইপিনে নাটালিয়াই দুয়োটা সন্তানক সুৰক্ষিত ৰাখিবলৈ সংগ্ৰাম কৰি থকা ব্যক্তিজনৰ বেদনা বুজি উঠিছিল। তেওঁ তেতিয়া দুয়োটা শিশুক বুকুত আঁকোৱালি লৈ কৈছিল, ‘হে মহান দেশৰ মহান সেনা৷ আপোনালোকে দেশৰক্ষা কৰক৷ এতিয়াৰে পৰা এই কণমানি শিশুদুটিৰ মাতৃ মই৷’ ‘দেশৰ হকে যুঁজ দি কঢ়িয়াই আনক দেশখনৰ সুখ-শান্তি’- এইবুলি কৈ নাটালিয়াই শিশু দুটিৰ গালত দিছিল মৰমৰ চুম্বন৷ তাৰ পাছতেই দেশৰ হকে যুঁজিবলৈ ব্যক্তিজন ভৰ্তি হয় ইউক্ৰেইনৰ সৈন্য বাহিনীত৷ তাৰ পাছতেই নাটালিয়াই শিশু দুটিৰ হাত ধৰি হাংগেৰীত উপস্থিত হৈছিল। য’ত শৰণাৰ্থীসকলৰ বাবে নিৰ্মাণ কৰা শিবিৰৰ বেঞ্চত বহি অপেক্ষা কৰিছিল।   ইউক্ৰেইনৰ এনে ঘটনাই সামাজিক মাধ্যমত যথেষ্ট চৰ্চিত হৈছে। উল্লেখ্য যে, অলপতে শ্বেয়াৰ হোৱা এটি ভিডিঅ’ই চকুলোৰে চকু সেমেকি উঠিছিল৷ ভিডিঅ’টোত দেখিবলৈ পোৱা গৈছিল যে, ইউক্ৰেইনৰ এগৰাকী মহিলাক বোমা বিস্ফোৰণৰ পাছত তেওঁৰ ঘৰৰ পৰা ধ্বংসাৱশেষ পৰিষ্কাৰ কৰা দেখা গৈছিল। মহিলাগৰাকীৰ চকুত চকুপানী আছিল কিন্তু তেওঁ গুণগুনাই আছিল ইউক্ৰেইনৰ ৰাষ্ট্ৰীয় সংগীত। ক্ষতিগ্ৰস্ত খিৰিকীৰ পৰা কাঁচৰ টুকুৰাবোৰ তুলি লোৱা মহিলাগৰাকীয়ে নিখুঁটভাৱে গাই গৈছিল ৰাষ্ট্ৰীয় সংগীটো। ইউক্ৰেইনৰ জনসাধাৰণৰ এই দেশপ্ৰেম বিশ্বৰ বাবে এক ডাঙৰ উদাহৰণ৷