হীৰাৰ আঙুঠিৰে কৰিছিল প্ৰেম নিৱেদন, প্ৰমাণ মচিবলৈ সুকেশে কাক দিছিল ১০কোটিৰ উপঢৌকন?

ডিজিটেল ডেস্কঃ অভিনেত্ৰী জেকলিন ফাৰ্ণাণ্ডেজক ২০০ কোটি টকাৰ হীৰাৰ আঙুঠিৰে প্ৰেম নিৱেদন কৰিছিল জালিয়াতিৰ গোচৰৰ অভিযুক্ত সুকেশ চন্দ্ৰশেখৰে। শেহতীয়া অনুসন্ধানত এই তথ্য পোহৰলৈ আহিছে। জানিবলৈ পোৱা মতে, সুকেশৰ সহকাৰী পিংকী ইৰাণীয়ে জেকলিনক তেওঁৰ সৈতে কথা পাতিবলৈ বাধ্য কৰাইছিল।ইয়াৰ পাছত, তেওঁ ভুৱা কলত অভিনয় কৰি জেকলিনৰ সৈতে নিজৰ ঘনিষ্ঠতা গঢ়ি তোলে। স্মৰ্তব্য যে, ঘনিষ্ঠতা বৃদ্ধি পোৱাৰ পাছত বিবাদত লিপ্ত হৈ পৰিছিল সুকেশ-জেকলিন। সকলোখিনি কৰি দিয়া বাবে সুকেশে পিংকীক ১০ কোটি টকাৰ উপঢৌকন দিয়া বুলিও অনুসন্ধানত প্ৰকাশ পাইছে। ইয়াৰ পাছতে জেকলিনক মূল্যৱান হীৰাৰ আঙুঠিৰে প্ৰেম নিৱেদন কৰিছিল সুকেশ চন্দ্ৰশেখৰে। মন কৰিবলগীয়া যে, সেই আঙুঠিটোত জেকলিন আৰু সুকেশৰ নামৰ আদ্যক্ষৰো খোদিত আছিল। সুকেশৰ পৰা বহুতো মূল্যৱান উপহাৰ লাভ কৰিছিল জেকলিনে। অভিনেত্ৰীগৰাকীয়ে নিজেই প্ৰৱৰ্তন সঞ্চালকালয় (ইডি)ৰ জেৰাত এই কথা স্বীকাৰ কৰিছিল। আনহাতে, জেকলিনৰ সৈতে প্ৰেমৰ সম্পৰ্ক থকা বুলি ইতিমধ্যে স্বীকাৰ কৰিছে সুকেশে। এক বিবৃতিত তেওঁ কয়, ‘মই জেকলিনৰ সৈতে সম্পৰ্কত আছিলো। গতিকে, মই তেওঁক মূল্যৱান উপহাৰ দিছিলো। মোৰ বিৰুদ্ধে উত্থাপিত প্ৰৱঞ্চনাৰ অভিযোগত কোনোধৰণে জড়িত নহয় জেকলিন।’