হেজহগ...ৰুছ সেনাৰ গতিৰোধ কৰিবলৈ একমাত্ৰ অস্ত্ৰ হৈ পৰা কি এই হেজহগ?

ডিজিটেল ডেস্কঃ হেজহগ-নামটো শুনাৰ লগে লগে চাজাৰুৰ দৰে দেখাত সৰু প্ৰাণীবিধৰ এখন ছবি সাধাৰণতে ভাঁহি আহে। সম্প্ৰতি ইউক্ৰেইনত ৰাছিয়ান টেংকৰ আক্ৰমণ প্ৰতিহত কৰাৰ ক্ষেত্ৰত এই হেজহগেই অন্যতম গুৰুত্বপূৰ্ণ প্ৰতিৰোধক হৈ পৰিছে। নামৰ মিল থাকিলেও কিন্তু এই হেজহগ আপুনি মই ভবাৰ দৰে সৰু প্ৰাণীবিধ নহয়। ডাঙৰ ডাঙৰ লোৰ বীমবোৰ কাটি সেইবোৰ জোৰা লগাই তৈয়াৰ কৰা হয় গাৰ্ডৰেল। জানিবলৈ পোৱা মতে, এই গাৰ্ডৰেলে ইউক্ৰেইনৰ গুৰুত্বপূৰ্ণ চহৰসমূহত ৰাছিয়ান টেংকৰ গতি অৱৰোধ কৰাত সহায় কৰিছে। ৰাছিয়াৰ বিৰুদ্ধে এই অস্ত্ৰসমূহ ইউক্ৰেইনৰ সৈন্য আৰু অসামৰিক লোকসকলে ব্যৱহাৰ কৰিলেও কিন্তু এই হেজহগৰ জন্মস্থানত পূৰ্বৰ চেকোস্লোভাকিয়াত। এইবোৰক 'এণ্টি-টেংক আক্ৰমণাত্মক প্ৰতিৰক্ষা' বুলি কোৱা হয়। দ্বিতীয় বিশ্বযুদ্ধৰ সময়ত পাতল আৰু মজলীয়া আকাৰৰ টেংকৰ গতিৰোধ কৰিবলৈ এই হেজহগৰ প্ৰাচীৰবোৰ পৰ্যাপ্ত ভাৱে কাৰ্যকৰী হৈছিল। যদি গাড়ী বা টেংক এখন লৌহ নিৰ্মিত প্ৰাচীৰৰ ওপৰেৰে পাৰ হ'বলৈ চেষ্টা কৰে তেন্তে আবদ্ধ হৈ পৰিব। আনকি ক্ষতিগ্ৰস্ত হোৱাৰো সম্ভাৱনা অধিক। এএফপি সংবাদ সংস্থাৰ এক প্ৰতিবেদন অনুসৰি, যিদিনা ৰাছিয়াই ইউক্ৰেইনত সামৰিক আক্ৰমণ আৰম্ভ কৰিছিল, পশ্চিম ইউক্ৰেইনৰ লুভিভেউভ চহৰৰ এদল লোকে ইউটিউব চাই হেজহগ নিৰ্মাণৰ কাম আৰম্ভ কৰিছিল। ওচৰে পাজৰে পোৱালোৰ সামগ্ৰীৰে এটাৰ পাছত আনটো হেজহগ তৈয়াৰ কৰিবলৈ আৰম্ভ কৰিছিল তেওঁলোকে। ছ’চিয়েল মিডিয়াটো এই বিষয়ে বাৰ্তা প্ৰেৰণ কৰা হৈছিল যে, আক্ৰমণকাৰী ৰুছ টেংক সমূহক বাধা দিবলৈ এই অস্ত্ৰ অতি কাৰ্যকৰী। এটা হেজহগৰ ওজন প্ৰায় ১০০ কিলোগ্ৰাম।