ডিজিটেল ডেস্ক: গোলকীয় উষ্ণতা বৃদ্ধিৰ ফলত ভয়ংকৰ বিপদৰ সন্মুখীন হ’ব পাৰে হিমালয়ৰ পাদদেশত বাস কৰা লক্ষাধিক লোক। বিশ্বৰ সৰ্বোচ্চ পৰ্বতমালাৰ ওপৰত আছে অজস্ৰ গ্লেচিয়াৰসৃষ্ট হ্ৰদ। শেহতীয়াকৈ পোহৰলৈ অহা তথ্যমতে হিমালয়ত থকা এনে ১৮৮টা হ্ৰদে যিকোনো মুহূৰ্ততে মাতি আনিব পাৰে ভয়ংকৰ বিপদ। উষ্ণতা বৃদ্ধিৰ ফলত প্ৰতিবছৰে গলিবলৈ আৰম্ভ কৰিছে এইসমূহ গ্লেচিয়াৰসৃষ্ট হ্ৰদ।
কাশ্মীৰ, লাডাখ, হিমাচল, উত্তৰাখণ্ড, ছিকিম আৰু অৰুণাচলত আছে ২৮ হাজাৰ ৪৩টা এনে হ্ৰদ। যাৰ ভিতৰত বিশেষজ্ঞই অতি বিপজ্জনক বুলি চিহ্নিত কৰিছে ১৮৮টা হ্ৰদক। যাৰ ফলত সৃষ্টি হ’ব পৰা বিপৰ্যয়ে বাৰুকৈয়ে ক্ষতিগ্ৰস্ত কৰিব পাৰে হিমালয়ৰ পাদদেশত বাসকৰ ৩ কোটিৰো অধিক লোকক। কেন্দ্ৰীয় গৃহমন্ত্ৰালয়ৰ অধীনস্থ ডিজাষ্টাৰ মেনেজমেণ্ট ডিভিজন আৰু হিমালয় পৰিৱেশ বিশেষজ্ঞৰ দ্বাৰা গঠিত এটা দলে বিগত এবছৰ ধৰি এই সন্দৰ্ভত চলাইছিল গৱেষণা। এই ক্ষেত্ৰত আটাইতকৈ বিপজ্জনক বুলি চিহ্নিত হৈছে দেশৰ পূৰ্বোত্তৰত থকা গ্লেচিয়াৰ সৃষ্ট হ্ৰদসমূহক। ১৮৮ টা বিপজ্জনক হ্ৰদৰ ভিতৰত কেবল ছিকিম আৰু অৰুণাচলত আছে ১২৯ টা হ্ৰদ।
আনহাতে কাশ্মীৰত ২৬টা, উত্তৰাখণ্ডত ১৩টা, আৰু হিমাচলত আছে ২০টা বিপজ্জনক হ্ৰদ। অধ্যয়নকাৰী দলটোৰ মতে ১৫ শতাংশ পৰ্যন্ত গলিবলৈ আৰম্ভ কৰিছে হিমালয়ৰ গ্লেচিয়াৰসমূহ। কিয়নো গোলকীয় উষ্ণতা বৃদ্ধিৰ ফলত ১.৫ ডিগ্ৰী চেলছিয়াছলৈ বৃদ্ধি পাইছে উষ্ণতা। যাৰ ফলত হিমালয় অঞ্চলত বৰ্ধিত তাপমাত্ৰাই ধাৰণ কৰিছে বিষমৰূপ। ২০২৩ চনত ছিকিমৰ লহোনক গ্লেচিয়াৰ হ্ৰদ ভাঙি পৰাৰ ফলত ১৮০ জন লোকৰ মৃত্যু ঘটাৰ লগতে ক্ষতিগ্ৰস্ত হৈছিল ৫ হাজাৰ কোটি টকাৰ সম্পত্তি।
একেদৰে ২০২১ত উত্তৰাখণ্ডত গ্লেচিয়াৰ হ্ৰদ ভাঙি পৰাৰ ফলত ২০৫জন লোকৰ মৃত্যু ঘটিছিল। আনহাতে ২০১৩ চনত কেদাৰনাথত সংঘটিত অনুৰূপ ঘটনাত প্ৰাণ হেৰুৱাইছিল কমেও ৩০ হাজাৰ লোকে। ভূমিকম্পৰ দৰে প্ৰাকৃতিক পৰিঘটনাৰ লগতে হিমালয়ত দীৰ্ঘদিনে আন্তঃগাঁথনি উন্নয়নৰ নামত চলি অহা প্ৰকৃতি ধ্বংসলীলাৰ বাবেই এতিয়া যিকোনো মুহূৰ্ততে ভয়ংকৰ বিপদৰ সন্মুখীন হ’ব পাৰে কোটি কোটি লোক।
Continue Reading
