ডিজিটেল ডেস্কঃ হঠাতে গেৰুৱা হৈ পৰিল ভূপাল প্ৰদেশ কংগ্ৰেছৰ কাৰ্যালয়! গেৰুৱা মানেই বিজেপি বুলি সকলোৱে জানে যদিও কংগ্ৰেছেও গেৰুৱা ৰংটোকে আঁকোৱালি লোৱাত এতিয়া বহুতেই আচৰিত হৈ পৰা পৰিলক্ষিত হৈছে।ভূপালৰ প্ৰদেশ কংগ্ৰেছ কমিটিৰ কাৰ্যালয়টো গেৰুৱা পতাকাৰে কিয় ঢাকি দিয়া হৈছে সেয়া জানিবলৈ বহুতেই কৌতূহলী হৈ পৰাও দেখা গৈছে।
প্ৰকৃততে মধ্য প্ৰদেশৰ ভূপালত কংগ্ৰেছৰ মুখ্য কাৰ্যালয়টো গেৰুৱা পতাকাৰে সজাই তোলাৰ এক বিশেষ কাৰণ আছে। ৰাজ্যিক কংগ্ৰেছে ভূপালত পূজাৰী সন্মিলনৰ আয়োজন কৰিছে। ৰাজ্যখনৰ বিভিন্ন জিলাৰ পৰা প্ৰায় ১,২০০গৰাকী পূজাৰীয়ে সেই সন্মিলনত ভাগ লৈছে। 'পূজাৰী প্ৰকোষ' সন্মিলন উপলক্ষ্যেই কংগ্ৰেছৰ কাৰ্যালয়টো গেৰুৱা ৰঙৰ পতাকাৰে সজোৱা হৈছে। 
পূজাৰীসকলক লৈ কংগ্ৰেছৰ এটা সংগঠনো আছে। তেওঁলোকৰ পতাকাৰ ৰঙো গেৰুৱা। উল্লেখ্য মধ্য প্ৰদেশৰ বিধানসভা নিৰ্বাচন এই বছৰৰ নৱেম্বৰত অনুষ্ঠিত হ'ব। কংগ্ৰেছ যোৱা বাৰ ক্ষমতালৈ ঘূৰি আহিছিল, কিন্তু চৰকাৰখন বেছি দিন স্থায়ী হৈ নৰ’ল। জ্যোতিৰাদিত্য সিন্ধিয়াই ক্ষুব্ধ কংগ্ৰেছ বিধায়কসকলৰ সৈতে পদ্ম শিবিৰত যোগদান কৰিছিল। ফলস্বৰূপে কংগ্ৰেছ চৰকাৰ খন ভাঙি গৈছিল আৰু শিৱৰাজ সিং চৌহানৰ নেতৃত্বত বিজেপি ক্ষমতালৈ আহিছিল।
আগন্তুক নিৰ্বাচনলৈ লক্ষ্য ৰাখি কংগ্ৰেছে দলীয় কৰ্মীসকলক একত্ৰিত কৰাৰ লগতে ধৰ্মীয় ৰীতি-নীতিক এক অস্ত্ৰ হিচাপে ব্যৱহাৰ কৰাৰ চেষ্টা কৰি আছে। ৰাজ্যিক কংগ্ৰেছৰ সভাপতি কমল নাথে অনুভৱ কৰে যে দলৰ স্বাৰ্থত হিন্দুসকলৰ বাবে পূজা পাৰ্বন আয়োজন কৰাটো প্ৰয়োজনীয়। যদি দলটোৱে ইয়াৰ পৰা আঁতৰি যায়,সেয়া বিজেপিৰ বাবে লাভজনক কথা হ’ব। পূজাৰী কোষৰ মুৰব্বী সুধীৰ ভাৰতীয়ে কয় যে যদি কংগ্ৰেছে চৰকাৰ গঠন কৰে, তেন্তে মন্দিৰত পুৰোহিত নিয়োগৰ পুৰণি ব্যৱস্থা প্ৰৱৰ্তন কৰা হ'ব।
Continue Reading
