হঠাৎ ইউক্ৰেইনৰ সৈন্যবাহিনীত যোগদান ভাৰতীয় ছাত্ৰৰ: দেশজুৰি ব্যাপক চৰ্চা

ডিজিটেল ডেস্ক: ৰাছিয়া-ইউক্ৰেইন সামৰিক সংঘৰ্ষই বিশ্বজুৰি আতংক, আশংকা আৰু উদ্বিগ্নতা কঢ়িওৱাৰ মাজতে এটি খবৰে দেশজুৰি চৰ্চা লাভ কৰিছে৷ যিসময়ত এই সামৰিক সংঘৰ্ষত ভাৰতে স্পষ্টকৈ কোনো এখন ৰাষ্ট্ৰৰে পক্ষ লোৱা নাই, তেনে সময়তে ভাৰতৰ এগৰাকী ছাত্ৰই ইউক্ৰেইনৰ সৈন্যবাহিনীত যোগ দিয়া ঘটনাই বিশেষ তাৎপৰ্য বহন কৰিছে৷ জানিব পৰামতে, ইউক্ৰেইনৰ অৰ্ধ-সামৰিক বাহিনীত যোগদ যোগদান কৰিছে তামিলনাডুৰ এগৰাকী ছাত্ৰই৷ ৰাছিয়াৰ আক্ৰমণৰ বিৰুদ্ধে যুঁজিবলৈ ইউক্ৰেইন সৈন্যক সহযোগিতা কৰিবলৈ ইউক্ৰেইন বাহিনীত যোগদান কৰিছে তামিলনাডুৰ কইম্বাটুৰৰ ২১বছৰীয়া ছাত্ৰ চাইনিকেশ ৰবিচন্দ্ৰনে৷ পূৰ্বে তেওঁ ভাৰতীয় সেনাতো যোগদান কৰিবলৈ আৱেদন কৰিছিল। ভাৰতীয় সেনাবাহিনীৰ বিষয়াসকলে তেওঁৰ বাসগৃহলৈ গৈছিল আৰু তেওঁৰ পিতৃ-মাতৃক এই বিষয়ে সোধা-পোছা কৰিছিল। তেওঁলোকে আৱিষ্কাৰ কৰিছিল যে ৰবিচন্দ্ৰনে ভাৰতীয় সেনাত যোগদান কৰিবলৈ আৱেদন কৰিছিল, কিন্তু সেয়া প্ৰত্যাখ্যান কৰা হৈছিল। ২০১৮ত চাইনিকেশে ইউক্ৰেইনৰ খাৰকিভৰ নেচনেল এইৰোস্পেচ বিশ্ববিদ্যালয়ত অধ্যয়ন কৰিবলৈ ইউক্ৰেইনলৈ গৈছিল। তেওঁ ২০২২ৰ জুলাইৰ ভিতৰত পাঠ্যক্ৰমটো সম্পূৰ্ণ কৰিব৷ ইউক্ৰেইনত চলি থকা যুদ্ধৰ মাজতে তেওঁৰ পৰিয়ালে চাইনিকেশৰ সৈতে সংযোগ হেৰুৱাই পেলাইছিল। দূতাবাসৰ সহায় বিচাৰি তেওঁলোকে চাইনিকেশৰ সৈতে যোগাযোগ কৰিবলৈ সক্ষম হৈছিল। তেতিয়া ৰবিচন্দ্ৰনে তেওঁৰ পৰিয়ালক জনাইছিল যে তেওঁ ৰাছিয়াৰ বিৰুদ্ধে যুঁজ দিবলৈ ইউক্ৰেইনৰ অৰ্ধসামৰিক বাহিনীত যোগদান কৰিছিল।